Raban nembiak patut pintar nguna teknologi digital -->
Cari Berita

Advertisement

Raban nembiak patut pintar nguna teknologi digital

Admin | beritaiban@gmail.com
January 23, 2018

Datuk Seri Fadillah Yusof
Tu beguna amat ngambi sida ulih besemekih ba jeman Industri 4.0 tauka Revolusi Industri Keempat, ku Fadillah.

KUCHING: Raban nembiak diatu patut pintar nguna teknologi digital ngambi ulih besemekih ba Industri 4.0 tauka Revolusi Industri Keempat.

Menteri Kereja Raya, Datuk Seri Fadillah Yusof madah Industri 4.0 ukai semina pekara ke bekaul enggau internet tang lebih agi ari nya ke dikumbai Internet of Things (IoT).

“Dunia diatu nyingkang ngagai Industri 4.0 ke alai IoT ukai semina dikena ba pengawa dagang tang dikena ba semua pekara ba pengidup kitai.

“Ambika chunto, sistem pengangkut pintar tau ngasuh entukar baru jemah digaga automatik, iya nya enda begunaka deriba.

“Berindik enggau nya, raban nembiak kitai ila ukai semina landik ba multimedia tang patut landik ngaga program Industri 4.0,” ku iya.

Iya mansutka jaku nya ba Malam Perpaduan Matang M10 begulai enggau nembiak, ketuai bansa sereta pengari gerempung ke ukai dikuasa perintah (NGO) ari kandang endur nya.

Program diatur Parti Pesaka Bumiputera Bersatu (PBB) Ranting Kampung Matang nengah kerejasama Kelab Rekreasi Kampung Matang Batu 10.

Fadillah ke mega Kaban Parlimen (MP) Petra Jaya nambah, kelimpah bala nembiak, bala apai indai pan patut meretika Industri 4.0 enggau ekonomi digital ti dikemerat maya ke diatu.

“Kepala Menteri enggau Menteri Besai meratka penau ba teknologi ekonomi digital ngambi ka menua sereta nengeri ulih mansang enggau lengkas.

“Ketegal nya, apai indai meseti meretika pekara ekonomi digital lalu meransang anak sida belajar teknologi nya,” ku iya.

Diatu ku Fadillah, Malaysia mengkang kurang engineer ba pekara komputer, ngaga program enggau ke pengawa ke bukai lalu pengurang nya patut dikerebut bala nembiak diatu.

Bela datai ADUN Tupong, Fazzrudin Abdul Rahman, Kaban Dewan Negara Senator Dr Zaiedil Suhaili sereta Ketuai Ranting PBB Kampung Matang, Wan Hashim Wan Sulaiman. #UtusanBorneo