Header Ads

  • Berita Tebaru

    RM200j diungkup kena ngemanah jalai kompeni kayu batang, ku Nanta

    Datuk Alexander Nanta Linggi
    MIRI: Jalai kompeni kayu batang ti nadai ditengah agi di Sarawak deka diangkat manah nengah belanja ungkup program ke sepenyampau RM200 juta ari perintah besai ungkup taun tu.

    Sapit Menteri Pemansang Menua Pesisir enggau Kandang Menua, Datuk Alexander Nanta Linggi madahka tu kediri ari kategori bukai ngemanahka jalai menua pesisir tauka projek ngangkatmanah ari baruh opis menteri (KKLW) tu.

    “Agih belanja tu semina dikena ngangkatmanahka jalai kompeni kayu batang ti nadai ditengah agi, kelimpah ari kategori ke bukai jalai menua pesisir ari baruh KKLW,” ku iya madah ngagai the Borneo Post.

    Ku iya, agih belanja RM200 juta ungkup program Renggat IV ari baruh opis menteri deka dilanchar opis menteri nya taun tu pengudah pemutus dijalai dalam randau antara opis menteri, Opis Kereja Raya (PWD) Sarawak enggau bala pengari rayat di menua nya.

    “Kitai dekaka rintai nya diputuska raban ke bisi pemerat ba pekara tu enggau jampat ngambika kereja ulih berengkah digaga tumu agi taun tu,” ku iya.

    Ku iya, tuju Renggat IV ngangkatmanahka jalai kompeni batang dipejalai di Sarawak taun tu, dikena nangkup peminta komuniti menua pesisir ti bepanggai idup ba jalai tu.

    Sitak Baram di Bagi Menua Miri udah nerima agih belanja besai sepenyampau RM70 juta, ditangkanka Kapit (RM 59 juta) lalu ke bukai baka Betong, Sri Aman enggau bagi menua ke bukai. Kapit iya nya bagi menua pemadu besai di nengeri tu, ditangkanka Miri.

    Tetiap kunteriktor udah dipadu bejalaika pengawa ngintu jalai ungkup Kapit, Miri sereta bagi menua ke bukai.

    Bagi Menua Miri udah merambu 199km jalai ari baruh kategori tu, enggau PWD sereta pengari rayat ti dipilih deka mutuska rintai ungkup Renggat IV lalu ti enda ulih disengkaum dipelaba deka dirintai dalam Renggat V tauka VI.

    Jalai tu iya nya dalam sitak parlimen Baram mungkur sitak kunsil nengeri Mulu, Telang Usan enggau Marudi.

    Menteri enggau bala pemesai udah ngabas menua Long Bedian di Baram kena Hari Satu minggu tu tadi, mutarka isu bekal ai di Telang Usan lebuh ke nemuai seraya gawa ke Baram kemari, sebedau mendingka penerang ari PWD di Miri ngalihari ensanus.

    KKLW bekerejasama enggau perintah nengeri nempa pelasar penerang ngagai pemansang infrastruktur menua pesisir di nengeri tu,lalu komiti begulai udah ditumbuh dikena mutarka peminta enggau tinda belanja ti diguna. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: