Header Ads

  • Berita Tebaru

    RM2.1 bilion projek ari RMK11 deka dipejalai ungkup pemansang Kapit

    Sharifah Hasidah Sayeed Aman Ghazali
    KAPIT: Menteri Muda Ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) Sharifah Hasidah Sayeed Aman Ghazali madahka ari baruh Atur Pemansang Malaysia Lumpar Ke-11 (RMK11) bisi sepenyampau RM2.1 bilion projek deka digaga di Kapit.

    Ku iya madah, tu penyampau ti besai ti beungkus RM2.1 bilion nengah RMK11 laban pemanah kaul pengawa kelebih agi Kaban Parlimen (MP) Kapit Datuk Alexander Nanta Linggi enggau perintah besai ti megai tanggungpengawa Sapit Menteri Pemansang Menua Pesisir enggau Kandang Menua Malaysia (KKLW) ba Putra jaya.

    Dulu agi ari nya, Sharifah bisi datai lebuh pengawa meri penerang bekaul ‘Pengawa Matau sereta Bejalaika Projek Transformasyen Menua Pesisir (RTP)’ ke digaga Residen Kapit Joseph Belayong. Lalu ku iya madah Kapit nerima agih belanja ti besai sepenyampau RM2.1 bilion.

    “Tu entara penyampau projek ti besai iya nya beungkus RM2.1 bilion. Penyampau ke diulih tu besai berindik ari Nanta ti megai tanggungpengawa di Kuala Lumpur nyadi Sapit Menteri KKLW. Pemaik tu diterima peranak Kapit ketegal Nanta udah nyediaka mayuh projek ungkup Kapit.

    “Berindik ari nya, dikena nentuka pemansang seruran bisi kitai meseti nyukung Nanta. Maya pengawa bepilih ti deka datai, kitai meseti meri sukung ngagai Nanta ngambika iya agi meruan ba perintah besai laban pengawa ke bekaul endang berat nentuka mayuh agi agih belanja diberi ungkup bejalaika projek di Kapit,” ku Sharifah bedau lama lebuh ti ngulu Pengerami Makai Lemai Begulai enggau Sayap Indu PBB Kapit ke digaga ba Hotel Meligai ditu.

    Iya mega madah, tetiap taun pengari rayat nerima RM5 juta ungkup RTP dikena bejalaika sekeda projek mit ke udah dipilih pengari ke diundi rayat. Projek nya lalu deka dipejalaika raban Komiti Pemansang enggau Pengelikun Genturung Pendiau (JKKK).

    “Keterubah aku datai ke Kapit, aku meda projek pemansang chakah dipejalai. Aku mega bisi diberi awak ngelawa sekeda genturung pendiau (Kampung Baru, Kapit Muhibbah Bletih) laban pengari BN ke diundi rayat endang siruka rayat lalu seruran bebendar bejalaika pengawa ungkup pemaik mensia mayuh,” ku iya nandu.

    Bejaku bekaul pekara orang indu, Sharifah madahka orang indu pesaka ti endang beguna ungkup PBB sereta mega menua tu. Iya madahka orang indu endang sukung ti enda ulih diteju. Orang indu endang ngembuan pengandal ngaga perintah BN.

    Iya nandu, Pengawa Bepilih Besai (PRU) deka digaga sebarang maya, lalu bela nesau semua kaban indu PBB ngambika sama begulai bekimpin ke chalun BN ba P215 Kapit enggau P216 Hulu Rajang.

    Chalun Chalun BN ba P215 Kapit iya nya Datuk Alexander Nanta Linggi enggau chalun BN ba P216 Hulu Rajang iya nya Datuk Wilson ugak Kumbong.

    Ku iya madah, PBB kering laban setengah ari kaban parti nya orang indu, lalu setengah ari pengundi mega orang indu. Orang indu ti nyadi raban renggat baruh ti ngasuh PBB kering laban kitai nyadi sayap parti.

    “Aku udah madah ngagai Datin Angelina Celestine Ujang lebuh datai ke Kapit iya nya aku meseti betemu enggau Wanita PBB laban ba aku endang pekara ti berat ngetanka kaul entara kaban enda ngira bansa, jalai pengarap, pengawa rama, kitai endang siti ruang bilik ti besai dalam rambai jaku ‘Sejiwa Senada’. Kitai anang ngelakka penatai asal kitai nyerakahka kitai semua laban kitai dalam siti parti PBB,” ku Sharifah.

    Sekretari Politik Kepala Menteri Dayang Nur Fizawati Bte Datuk Abang Karim, sekretari kediri Sharifah – Sharifah Noraini Bte Sayeed Amen Ghazali sereta bini Nanta- Datin Angelina Celestine Ujang, ketuai Wanita PBB Pelagus Anita Kembira, Ketuai Wanita PBB Baleh Minor Panyau, ketuai Wanita PBB Katibas Rose Demon, kaban veteran PBB Anchang tun Jugah, Pemesai Khas Nanta- Ambrose Abong Bugek, Kunsilor George Tang entara sida ke bisi datai ngulu pengerami makai lemai nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: