Header Ads

  • Berita Tebaru

    Rumah Benggau Andah mujur bulih gelar champion ADP Renggat Nasional 2017

    KENANG: Nanta (bediri, enam kanan) begulai enggau bala bukai begambar ba mua replika Kenyalang di Gelanggang Futsal.
    KAPIT: Bisi beratus iku peranak ari Rumah Benggau Andah, Nanga Sut, Baleh ditu berami makai selamat ngintu pemujur dijapai bala nembiak ba peresa UPSR 2017 apin lama ke udah, seraya ngintu penatai Taun Baru 2018 sereta mantaika pengaga ati agi sida ke udah menang ba Pekit Anugerah Desa Perdana (ADP) Renggat Nasional Taun 2017.

    Rumah nya udah bulih gelar champion dalam kategori Rumah Panjai, lalu sida nerima perais mata duit RM150,000 enggau setipikit ke disua Menteri Besai Datuk Seri Najib Tun Razak.

    Program tu ke diatur Opis Menteri Pemansang Menua Pesisir enggau Kandang Menua (KKLW), udah ngerintai mayuh bengkah kategori dalam Pekit Anugerah Desa Perdana (ADP) Renggat Nasional – Kampung Melayu, Kampung Orang Asli, Rumah Panjai enggau Genturung Pendiau.

    Batang tuju pekit tu dikena meri peransang ngagai genturung pendiau ngambika mansang sereta ngatur singkang dikena ngenyemakka bida takah digital sereta ngelakuka aktiviti ekonomi entara kandang mengeri enggau menua pesisir.

    Rumah Benggau Andah udah bulih gelar champion ti ngalahka lima ribu rumah panjai ke bukai di nengeri tu.

    Rumah panjai 23 pintu bilik disambung nengah Jalai Mujong-Kapit, ngembuan bekal kuasa karan 24 jam sereta bekal ai baruh tanah, bisi paking kereta, gelanggang futsal sereta palan nyeridi nembiak mit (tadika).

    Dalam taun 2015, penuduk Lumur Dua dipenggi Rumah Jambon Anak Antas, Nanga Ensilai, Batang Rajang ditu.

    BEBAJIK: Bala indu ngerasukka ngepan asal nganti penatai temuai ba mua rumah panjai rambau atur pengerami nya.
    Komiti Pemansang Enggau Pengelikun Genturung Pendiau (JKKK) Rumah Benggau Anak Andah udah ngangkatka nama Kapit nyadi rumah panjai keterubah menggi gelar champion ba tikas nasional dalam Pekit ADP ungkup Kategori Rumah Panjai Taun 2017 ke udah diatur KKLW.

    Tuai Rumah Benggau disempulang bala kaban komiti ke bukai udah nerima perais ngarika JKKK sida.

    Nanta meri pengaga ati ngagai JKKK Rumah Benggau ke udah menang pekit ADP ungkup Kategori Rumah Panjai.

    Ku iya, tu kenang besai ngagai peranak Kapit sereta rumah panjai tu patut nyadi chunto ngagai JKKK ke bukai di Kapit.

    DISIKAP: Entara perengka guna ke bisi ba rumah panjai baka gelanggang futsal, paking kerita enggau tadika.
    Ngelansa pasal penyapai Opis Pelilih Kapit begulai enggau ejensi perintah bekaul sereta saup ari bala pengari rayat baka Kaban Kunsil Nengeri (ADUN) Pelagus, Wilson Nyabong Ijang enggau Kaban Parlimen (MP) Kapit, Datuk Alexander Nanta Linggi, deka ngangkatmanah atur pengawa enggau pekara bukai dalam JKKK.

    Pekara ti beguna endar iya nya perintah dekaka JKKK Rumah Benggau nyadi chunto ngagai JKKK bukai di Kapit. Semua JKKK dipinta ngemanahka gaya pendiau rumah panjai sida, rampa enggau atur pengawa ngambika sida ulih bepekit sereta menang ba pekit dudi hari.

    Pengaga tu mega dikunsi Sapit Menteri Pemansang Menua Pesisir Enggau Kandang Menua Datuk Alexander Nanta Linggi, ADUN Pelagus Wilson Nyabong Ijang, ADUN Bukit Goram Jefferson Jamit Unyat, Sekretari Politik Kepala Menteri Sarawak – Nicholas Kudi Jantai enggau Tapah Ata sereta bala bukai ke bisi dikangau datai ngulu pengerami nya. #UtusanBorneo

    No comments

    Post Top Ad