Header Ads

  • Berita Tebaru

    Sarawak patut mekuh ngagai makit pemakai Halal

    FOKUS NGAGAI MAKIT PEMAKAI HALAL: Wong (tengah) mendingka penerang ari Menijar Besai pekara Betanam Betupi enggau Rampa Menua Bagi Menua YAST Group, Zelt Kueh, ti datai ngarika pemungkal YAST, begulai enggau Chairwoman Easter Law (kanan) sereta bala kaban deligit ke bukai di opis iya di Bangunan Baitulmakmur di Kuching ditu, kemari.
    KUCHING: Ketegal bisi mayuh peminta pemakai Halal di serata dunya, Sarawak patut mekuh ngagai chara pemadu manah ngaul diri ba makit ke bansa nya, pia ku Menteri Dagang Antarabansa enggau E-Dagang Dato Sri Wong Soon Koh.

    Iya nyemetak madah enggau pemayuh tanah, pekara ti patut digaga Sarawak iya nya kuasa mansutka asil betanam ba dagang skala besai dikena nentuka ulih nangkup peminta besai bekal produk ke bansa nya.

    “Tambah mega China bisi makit besai ungkup produk pemakai Halal. Pia mega mayuh menua bukai bisi peminta ke chukup tinggi. Nya kebuah kitai meseti ngiga pemeranak puku dikena ngemansangka tanah kitai ungkup pengawa betanam dagang besai.

    “Nengah chara tu kitai ulih mantu peranak asal nyungkak penatai pemisi sida seraya ulih nempa nengeri nyadi hub pemakai Halal,” ku Wong lebuhka nerima penemuai meri basa ari YAST Group di opis iya di Bangunan Baitulmakmur ditu, kemari.

    Ambika chunto utai tanam baka nanas enggau buah bemusim, ku iya, enti nyema Sarawak ulih mansutka utai tanam baka nya enggau kualiti ti besai, endang seruran bisi makit di China, Jepun enggau Korea Selatan.

    “Ba sitak menua dipegai aku, raban orang bumai ulih teulihka penatai pemisi RM16,000 sebulan ari rega nyual buah bemusim. Nya alai, nyema ulih, bai orang bumai nanam nya, kitai deka bulih nyampau nya,” ku Wong, ke mega Kaban Kunsil Nengeri (ADUN) Bawang Assan.

    Wong mega nyemetak madahka polisi Nengeri di baruh pegai Kepala Menteri Datuk Patinggi Abang Johari Tun Openg dekaka Sarawak fokus ngagai ekonomi digital, pengawa betanam betupi enggau dagang temuai.

    “Nya kebuah kitai patut ransing agi gawa ngulihka pemeranak puku datai kitu ungkup pengawa betanam betupi chara moden. Ari pengawa tu, kitai bisi jamin ba bekal pemakai mega. Laban ke diatu, bekal pemakai kitai semina ulih tan enam bulan pengelama. Enti sema perang nyadi, semua kitai deka ngiga pemakai dikena idup,” ku iya madah nyemetak.

    Ngelansa pasal pengawa ngeluarka pemakai, iya ngarapka Opis Menteri Betanam Betupi Moden, Tanah Adat enggau Pemansang Kandang Menua deka ulih mantu pemeranak puku menua luar ngambi ngemansangka tanah besai agi di Tanjung Manis ti udah diaku Perintah Sarawak ungkup pemansut pemakai Halal.

    “Ba piak aku, aku deka mantu matak pemeranak puku ngagai Sarawak. Nya kebuah aku ngarapka opis menteri bukai deka gerah agi jari ngambi ngemuntangka agi pemansang dagang di nengeri tu,” ku Wong nama, ke mega nyadi Menteri Wang Kedua. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: