Sarawak seruran merambu pemansang dulu ari nengeri bukai, ku Azih -->
Cari Berita

Advertisement

Sarawak seruran merambu pemansang dulu ari nengeri bukai, ku Azih

Admin | beritaiban@gmail.com
January 23, 2018

NYADIKA KENANG : (Bediri baris mua, tengah) Azih, Zainal enggau Morshidi begambar bebala mayuh enggau penyereta program ‘Wacana-Jelajah Transformasi Nasional 50n (TN50)’di Kuching kemari.
KUCHING: Sarawak seruran ngembuan perambu pemansang ke dulu ari nengeri bukai, ku Presiden CUEPACS Datuk Azih Muda.

Ba pekara digital ku iya, Sarawak mega entara nengeri ke dulu nguna polisi nya ba atur pemansang.

“Di Sarawak perambu ba pekara pemansang seruran dulu enti dibanding enggau nengeri bukai.

“Pekara tu mungkur pemansang ba digital ekonomi, sosial enggau pekara bukai ke bekait,’ku iya.

Azih mansutka jaku ba aum pengarang berita pengudah ngulu program ‘Wacana-Jelajah Transformasi Nasional 50 (TN50)’ di Dewan Undangan Nengeri (DUN) Lama, Petra Jaya ditu, kemari.

Program ke diatur CUEPACS nya ngundang temuai dipebasa, Ketuai Direktor Opis Pengereja Pengawa Perintah Malaysia Tan Sri Zainal Rahim Seman enggau Sekretari Perintah Sarawak Tan Sri Datuk Amar Morshidi Abdul Ghani.

Ngenang kaul ke sama, Azih netapka CUEPACS deka mantu perintah nyengkaum perintah Sarawak nyapai juluk ke ditetap.

Ku iya, CUEPACS deka nyaup nerenak pemereti sentang TN50 ngagai orang gawa perintah iya nya raban penyendia servis ngambi TN50 ulih dijapai.

“CUEPACS mantu perintah nentuka orang gawa kelebih agi sida ke beumur baruh 40 taun meretika juluk ke udah ditetap.

“Nama penyadi enti orang gawa (penyendia servis) tu enda meretika pinta enggau peneka rayat,’ku iya.

Pinta enggau peneka raban nembiak bebida enggau sida ke tuai lalu pia mega ba sentang tangkup pengawa penyendia servis perintah, tandu Azih.

Program kemari digulu orang gawa ari mayuh bengkah ijinsi perintah ke alai randau bejuraika pekara (pemansang tauka servis) ti dikedeka raban nembiak jemah ila.

Bela datai Pemesai ‘Khas’ Menteri Besai Hizatul Isham, Direktor Biro Tata Negara Sarawak Yunus Taib enggau Chairman CUEPACS Sarawak Ahmad Malie. #UtusanBorneo