Header Ads

  • Berita Tebaru

    Sarawak ulih nyadi nengeri pemadu tegap ba taun 2030

    Datuk Patinggi Abang Johari Tun Openg
    Tu bekau ari penegap PBB ke nyadi tulang belakang pemansang nengeri ditambah enggau pemansang ekonomi digital.

    MIRI: Sarawak ulih nyadi nengeri pemadu tegap di Malaysia datai ba taun 2030 ketegal penegap Parti Pesaka Bumiputera Bersatu (PBB) ke nyadi tulang belakang pemansang nengeri ditambah enggau pemansang ekonomi digital ke udah dalam juluk.

    Kepala Menteri ke lalu nyadi Chairman PBB, Datuk Patinggi Abang Johari Tun Openg madahka, PBB nyadi sebuah parti ti relevan ba tiap jeman lalu ngembuan struktur tegap mujur ngemai Sarawak ba jalai ke betul.

    “Bepun ari jeman Tun Pehin Sri Abdul Taib Mahmud (diatu Tuai Pemegai Menua -TYT Sarawak) ngagai niang Tok Nan (Tan Sri Adenan Satem) lalu diatu aku, pengawa ditegika PBB mujur ngenegapka politik sereta meri awak ngagai perintah ngemansangka Sarawak baka ke diatu.”

    “Diatu, politik di Sarawak pemadu meruan di Malaysia. PBB nyadi parti pemadu berani ngaga ubah sereta kering deka berubah.

    “Pemansang enggau penegap diasaika diatu asil ari jasa PBB,” ku iya lebuh bejaku bejadika Aum Bala Pengari Pampang PBB Zon 10 Miri di sebengkah hotel ditu, kemari.

    Bisi 1,200 datai ari kaban Kaunsil Tetinggi, exco, bala kaban parti sereta pemerati ari lapan pampang PBB iya nya Bekenu, Lambir, Piasau, Pujut, Senadin, Marudi, Telang Usan enggau Mulu datai ngulu pengawa malam nya.

    Ku Abang Jo nambah, semua atur pengawa ngalih kuasa lanchar dipejalai laban PBB pechaya lalu bepegai ba prinsip penuai runding dalam pengawa politik.

    Ba lansa ke bukai, iya dekaka chara gawa dagang temuai di Miri ngena chara ‘online’ dikena matak mayuh agi penatai temuai kitu.

    TEPA: Gerawat nyuaka tepa ngagai Abang Jo rambau atur pengawa bejadika Aum Bala Pengari Pampang PBB Zon 10 Miri ditu kemari, sama bisi dipeda (ari kanan) Mohd Asfia, Uggah seraya ari kiba, Stephen Rundi enggau Tengah.
    “Sektor menua tu tau ngelakuka Tanah Tinggi Bario ti tebilang enggau produk berau Bario kelimpah kandang tebing tasik Bekenu nyadi pematak temuai. Kelimpah ari nya, produk kraf jari Orang Ulu di Miri tau rembus ngagai makit antarabansa nengah kedai ‘online’,” ku iya.

    Ngelansa pasal pengawa numbuhka sarikat minyak enggau gis, Petroleum of Sarawak (Petros), Abang Jo madahka nengeri tudeka nyadi pemain besai dalam sektor tu.

    “Beri timpuh pengelama dua taun, maya Petros udah gawa ila lalu ngambi semua awak dalam industri minyak enggau gis,” ku iya seraya nambah, pengawa numbuhka Petros ngulihka Sarawak ngasaika pemaik enggau penguntung terus ari pemansut minyak enggau gis.

    Ba pekara tu ku iya, PBB deka seruran negika hak Sarawak nyengkaum berunding enggau perintah besai ngulihka mayuh agi hak ke sebedau tu enda diulih.

    Dulu agi ari nya, Penyelaras ZON 10 ke lalu nyadi Kaban Kunsil Nengeri (ADUN) Mulu enggau Sapit Speaker Aum Kunsil Nengeri (DUN) Sarawak, Dato Gerawat Gala madahka antara pemutus dijapai rambau baum iya nya nyukung pemutus Kaunsil Gawa Tertinggi (MKT) ngetanka Abang Jo nyadi Chairman PBB enggau nadai diperebut dalam Aum Besai Bala Pengari parti ke deka datai.

    “Kelimpah ari nya, kami mega nyukung pemutus MKT parti ba kededua pangku pengawa Sapit Chairman ke diatu ditan mangku pengawa nadai diperebut kelimpah pangku pengawa Ketuai Indu enggau Ketuai Nembiak enda diperebut maya Aum Besai Bala Pengari.”

    Ku Gerawat nambah, dalam timpuh setaun Abang Jo mujur ngaga sereta bejalaika polisi baru nyungkak ekonomi enggau pemansang ngemai pangka tinggi, antara iya pengawa numbuhka Sarawak Pay, Petros, kampung digital enggau Opis Menteri Pelajar Sains enggau Pansik Teknologi di renggat nengeri.

    Sama bisi datai kededua Sapit Chairman ke lalu nyadi Sapit Kepala Menteri, Datuk Amar Douglas Uggah Embas, Datuk Amar Awang Tengah Ali Hasan, Sekretari Besai PBB Datuk Seri Stephen Rundi Utom, Chairman Mendam PBB ke lalu nyadi Speaker DUN Sarawak Datuk Amar Mohd Asfia Awang Nassar sereta bala temuai dipebasa ke bukai. #UtusanBorneo

    No comments

    Post Top Ad