Header Ads

  • Berita Tebaru

    Semua etnik Dayak di Sarawak dikearap begempung mutarka bemacham penanggul

    BANTU: Samuel (lima kanan) nguluka PAIS nyuaka pemeri ngagai Selimah ari Lepong Ajai, Liam, di Bakong.
    MIRI: Serakup Iban Sarawak (PAIS) ngarapka semua etnik Dayak di nengeri tu ulih begempung sereta besaup mutarka bemacham penanggul kelebih agi isu bekaul enggau pelajar ti agi begunaka perati, sereta main asal enggau adat lama ti majak punas.

    Ditumbuh enggau tuju negika pemerat sereta hak komuniti Dayak kelebih agi bansa Iban, PAIS mega ngarapka mayuh agi pengawa puang diberi ngagai peranak asal Sarawak ukai semina dalam sektor perintah aja, tang mega peribit.

    PAIS mega dekaka ejensi perintah ti bekaul meri bantu ari sukut belanja ngagai nembiak pandai ti seranta nampung pelajar ngagai tikas tinggi agi, kelebih agi sida ti teulihka pemutus nyulut dalam peresa.

    Ari sukut main asal enggau adat lama Iban, PAIS bepenemu tu pekara ti beguna endar lalu patut dijaga sereta ditan ngambika ulih ditampung rebak dudi hari, laban iya ukai semina ngayanka kelai bansa Iban aja, tang mega pekara ti tau dikelaku ngarika bansa Iban di renggat tinggi agi.

    Ba lansa ke bukai, PAIS udah rejista enggau Pengerejister Gerempung (ROS) dalam bulan Disember taun nyin tadi, betuaika Samuel Suring ke nyadi presiden sereta disereta Walter Sela nyadi mandal presiden I, Joseph Engkasan (mandal presiden II) enggau Hafiszah Abdullah nyadi sekretari kelimpah ari 25 iku kaban komiti ke bukai bela dichiri.

    Taja baru dilanchar taun nyin tadi, timbal chukup manah diterima ngujungka serakup tu ulih bediri teguh sereta ngerembai ngagai beberapa pampang di serata nengeri.

    Kebuah pia, PAIS sebedau tu dulu gawa ngena nama Dayak 360 (tang direjista enggau ROS ngena nama PAIS), suah bejalaika pengawa pengasih ungkup komuniti Dayak lalu udah mayuh ngatur aktiviti kelimpah nyukung pengawa ditegika gerempung ukai dikuasa perintah (NGO) Dayak ke bukai.

    “Kelimpah nyadika Miri nyadi ‘indu opis’ serakup berindik ari iya direjista ditu, PAIS diatu udah bisi pampang di Limbang, Bintulu, Sibu, Betong, Sri Aman enggau Kuching,” ku iya madah ngagai Utusan Borneo ditu, kemari.

    Pengawa ngelancharka PAIS uda diatur di Gua Long House Miri kena 13 Januari tu tadi lalu bela digulu pemantu khas Menteri Muda Dagang Temuai, Seni enggau Main Asal Datuk Lee Kim Shin, iaitu Erick Chin, ke mega Ketuai Biro Sebana Mensia Mayuh SUPP.

    PAIS di Miri mega udah chakah gawaka aktiviti belalauka komuniti nyengkaum meri bantu ngagai raban begunaka bantu lalu apin lama ke udah, nitih ku Samuel, sida udah nganjung bantu ngagai indai tunggal, Selimah Chelagat ari Lepong Ajai di Liam, Bakong.

    “Kelimpah ari nyadi indai tunggal melanja dua iku anak ti agi besekula, Selimah mega nyadi siku ari orang tasah pengudah rumah iya kena laban tanah tusur apin lama ke udah tang nadai nerima bantu ari raban (opis) pengintu pengelantang,” ku iya nambah.

    “PAIS berasai sinu enggau pendiau iya lalu udah meri bantu mimit ti dikearap ulih ngelempungka tating penusah iya ke nyadi indai tunggal,” ku iya nerang.

    Kelimpah ari nya, PAIS mega bisi mantu program ‘Pengada Laun Direjista’ ke diatur Biro Sebana Mensia Mayuh SUPP dalam bulan November taun nyin tadi, meransang mensia mayuh ke apin bisi dokumen pengelala diri, nganjung peminta sida. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: