Semua kes ba kort Sabah, Sarawak patut ulih diputar manggai Sept 2018 - Berita Iban Online

Header Ads

  • Baru Nyadi

    Semua kes ba kort Sabah, Sarawak patut ulih diputar manggai Sept 2018

    Tan Sri Richard Malanjum
    MIRI : Kort ba Sabah enggau Sarawak udah datai ba tikas mutarka kes-kes mantar 2017 lalu nyelinting semua kes nya patut ulih diputar manggai September 2018, ku Akim Besai Sabah enggau Sarawak Tan Sri Richard Malanjum kemari.

    “Reti tu manggai bulan nya, semua kes ba Sabah enggau Sarawak deka teputar dalam timpuh ke udah diletak,” ku iya rambau Pengawa Mungkal Taun Undang-Undang Sabah enggau Sarawak 2018 dipenyadika Kepala Akim Menua  Tun Md Raus Sharif ditu.

    Bepelasarka pechah kes diputar, Richard madah Kort Tinggi Sabah udah mutarka 75.5 peratus kes sivil enggau 555 kes nganti diputar lalu ungkup kes penyalah, 72 peratus kes udah teputar lalu 206 kes agi nganti diputar.

    Malanjum madah Kort Sesyen Sabah udah mutarka 80.33 peratus kes sivil enggau 594 kes tu benung nganti diputar lalu ba kes penyalah, 90 peratus kes udah teputar lalu 856 kes agi nganti diputar.

    Ungkup kes sivil, iya madah Kort Majistret Sabah udah mutarka 83.21 peratus kes lalu 2,542 kes agi nganti diputar lalu naka tu ba kes penyalah, 82.14 peratus kes diputar lalu 3,048 kes agi nganti diputar.

    “Ungkup kes sivil ba Kort Tinggi Sarawak, 79.5 peratus kes udah diputar lalu  705 kes agi nganti diputar ditangka kes penyalah udah diputar iya nya  71.32 peratus lalu 252 kes agi nganti diputar,” ku iya.

    Ba Kort Sesyen Sarawak, iya madah 67.9 peratus kes udah diputar lalu 870 kes agi nganti dipautar lalu ba kes penyalah, 70 peratus kes diputar lalu 852 kes agi nganti diputar.

    “Ba Kort Majistret Sarawak, kes-kes penyalah ke diputar iya nya 83.59 peratus lalu 1,922 kes nganti diputar udah nya ungkup kes penyalah 84.40 peratus kes diputar lalu  1,383 kes agi nganti diputar,” ku iya.

    Kelimpah mutarka kes-kes lama, iya madah program besemak enggau komuniti di Sabah enggau Sarawak deka ditampung nengah inisiatif Kort Mindah Kin Kitu, program Bilik Randau Kort Mindah Kin Kitu lalu projek rampa menua lalu Sarawak udah nerima bas baru deka dikena ngagai Bintulu.

    Bela bisi datai ba pengawa nya Presiden Kort Apil Tan Sri Zulkefli Ahmad Makinudin, Akim Besai Malaya Tan Sri Ahmad Maarop, Luyar Menua Perintah Besai Tan Sri Mohamad Apandi Ali, Luyar besai Nengeri Sabah Zaleha Rose Pandin, Luyar Besai Nengeri Sarawak Datuk Talat Mahmood Abdul Rashid, Presiden Gerempung Undang-undang Sabah Brenndon Keith Soh enggau Presiden Gerempung Luyar Sarawak Ranbir Singh Sangha. #Bernama

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads