Header Ads

  • Berita Tebaru

    Seruran meri sukung ke perintah ngambika pemansang ulih dipejalai

    Datuk Seri Tiong King Sing
    BINTULU: Rayat di sitak Parlimen Bintulu dikeandal seruran nyukung perintah ba pengawa nentuka pemansang enggau projek seruran ulih dipejalai enggau lanchar di sitak nya sereta mai pemaik ngagai semua peranak iya.

    Kaban Parlimen (MP) Bintulu, Datuk Seri Tiong King Sing madahka rayat di sitak Bintulu enggau nengeri tu dikearap ngembuan runding nerima penemu sereta tuai agi beratika asil pemansang ti udah dibai perintah.

    Kelimpah ari tanggungpengawa pengari rayat, Tiong mega ngansak ngambika ejensi perintah sikar meri servis, gawa ngagai renggat baruh mantu matau penanggul tauka isu dibantaika rayat sereta gawa mutarka penanggul ditapi rayat.

    Iya belalauka pasal penanggul ditapi rayat ti napi pengerugi pengudah utai tanam sida rusak rambau penusah bah apin lama ke udah.

    “Pekara tu udah dibai ngagai Sapit Kepala Menteri ke lalu nyadi Chairman Komiti Penusah Ngenyit Nengeri Sarawak ke mega Menteri Betanam Betupi Moden, Tanah Adat enggau Pemansang Kandang Menua, Datuk Amar Douglas Uggah Embas ngambika pengawa ke patut dipejalai,” ku iya seraya ngelalau peranak ti kena pangka ngeripot pekara nya ngagai opis pelilih enggau Opis Betanam Betupi besemak.

    Tiong mansutka jaku nya rambau pengawa ngabas tujuh buah rumah panjai mungkur Rumah (Rh) Bawit Banta, Rh Belaja Dali di Sungai Setapang; Rh Mujah Kayan (Sungai Satai); Rh Thomas Muguong (Lubok Gala, Pandan); Rh Hillary Lestes Anggat (Pandan); Rh Desmond Lenus Geliga (Lubok Gala, Pandan) enggau Rh Seman Jubin (Sungai Lebus Binyo) beberapa hari ke udah.

    Pejalai nya mega bela disempulang bala pengari ejensi enggau opis perintah, datai ari Opis Pengintu Pengelantang Mensia Mayuh (JKM) Bagi Menua Bintulu, Opis Pengerejista Bansa (JPN) Bagi Menua Bintulu, Opis Bekal Ai Menua Pesisir Bagi Menua Bintulu, Opis Kereja Raya (JKR), Opis Tanah enggau Survei (JTS) Bagi Menua Bintulu, Opis Pengerai Bagi Menua Bintulu sereta bala kaban Parti Demokratik Progresif (PDP).

    Ba lansa bukai, Tiong minta peranak menua pesisir kelebih agi rumah panjai enda mendingka penemu penyakal ti betenahka perintah.

    Ku iya, rayat patut nemu reti pengawa perintah ke bisi diatu ngintu nasit rayat sereta ngemeratka pekara pengelantang rayat bejalaika bemacham transformasyen dikena nyungkak tikas idup rayat nadai ngira asal penatai, gaya pendiau enggau jalai pengarap. #UtusanBorneo

    No comments

    Post Top Ad