Header Ads

  • Berita Tebaru

    Servis Uber enggau Grab di Sarawak sigi enda diketu

    APLIKASYEN BARU: Abang Johari (dua kanan) benung ngujika Kuching Virtual Reality (VR) App iya nya sebengkah aplikasyen ke baru dilancharka iya empu ba Universiti Teknologi Swinburne ditu, kemari.
    KUCHING: Sarawak sigi enda ngetuka servis Uber enggau Grab diketu di nengeri tu taja dua bengkah servis nya kala dibantah Gerempung Teksi Sarawak bedau lama tu tadi.

    Kepala Menteri Datuk Patinggi Abang Johari Tun Openg madah pemutus perintah nengeri nya udah dipadah ngagai Gerempung Teksi Sarawak.

    “Kitai enda ulih ngasuh servis Uber enggau Grab diketu ditu.

    “Taja pia, aku udah ngasuh sida (Gerempung Teksi Sarawak) ngaga aplikasyen sida empu,” ku iya.

    Abang Johari mansutka jaku nya ba pengawa ngelanchar Kuching Virtual Reality (VR) App di Universiti Teknologi Swinburne ditu, kemari.

    Iya nambah servis ke disedia Uber enggau Grab manah agi ari servis ke disedia teksi lalu minta gerempung nya ngangkatka ikas servis sida.

    “Perundingka dulu servis ke disedia kita (teksi), asai aku servis Uber enggau Grab manah agi.

    “Sigi nadai pilih bukai, kita deriba teksi meseti ngangkatka servis,” ku iya.

    Kena 8 Januari tu tadi raban deriba teksi di Mengeri Kuching ngatur gempuru likun di laman Dewan Undangan Nengeri (DUN) Lama mantah servis Uber enggau Grab di nengeri tu.

    Gempuru likun ngujungka nadai servis teksi di Mengeri Kuching kelebih agi di Palan penerbai bilun Antarabangsa Kuching (KIA) sehari nya.

    Raban tu mantah servis Uber enggau Grab ketegal ti nyadika kebuah penatai pemisi sida kurang. #UtusanBorneo

    No comments

    Post Top Ad