Header Ads

  • Berita Tebaru

    Servis Uber enggau Grab trend baru lalu enda ulih diketu sengapa

    LOGO: Uber enggau Grab
    KUCHING: Sektor dagang temuai Sarawak deka napi pangka nyema perintah ngetuka semua operasyen Uber enggau Grab ba nengeri tu.

    Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madah kebuah pia laban sistem perengka pengangkut mensia mayuh ba Sarawak agi kurang menyana.

    Tambah mega, Uber enggau Grab udah nyadi trend baru ba sistem pengangkut di dunya seriris enggau pemansang teknologi digital.

    “Enti operasyen Uber enggau Grab diketu, tentu iya deka meri pangka ngagai industri dagang temuai nengeri lalu pendiau servis perengka pengangkut mensia mayuh ditu empai menyana.

    “Orang ti bejalaika servis teksi enda ulih ngansak perintah ngetuka operasyen Uber enggau Grab laban serata dunya udah nguna servis tu” ku iya maya aum pemberita ditu, ensanus.

    Iya madah munyi nya dikena nimbal ulah lebih 200 deriba teksi ti begelumu likun apin lama ke udah mantah operasyen Uber enggau Grab ba Sarawak.

    Kenu ku iya servis Uber enggau Grab dikerinduka temuai menua luar baka ari Singapura, Hong Kong, United Kingdom pia mega ba Kuala Lumpur laban sida udah teleba nguna servis tu ba menua diri.

    “Tu endang penyadi ke patut diterima orang ke deriba teksi konvensional laban nya berindik ari pangka pemansang teknologi lalu bekaul enggau kuasa bala penguna milih, pekara ke tusah deka ditagang.

    “Penanggul tu ukai semina nyadi ngagai deriba enggau orang ke bejalaika servis teksi ba Sarawak tang ba serata dunya ninting kali bisi ubah ba sistem,” ku iya.

    Nya alai iya ngarapka deriba teksi konvensional patut nemu ubah sistem enggau industri.

    Deriba teksi mega ku iya patut beratika penanggul ditapi sida maya tu enggau penuh lalu sedia berubah ngagai chara kereja ti baru.

    “Nyema sida (deriba teksi) ngasaika kelalu pedia mai teksi, sida patut berunding panjai iya nya nambahka agi penatai pemisi sida nyengkaum mai Uber tauka Grab,” ku iya.

    Berebak enggau nya, iya pechaya perintah engka ulih beratika penanggul ditapi deriba teksi enggau lebih silik baka nendur tauka ngurangka ungkup operasyen sida.

    Perintah mega ku iya patut beguna awak beratika servis Uber enggau Gran nengah chara sistematik iya nya nengah mayuh atur.

    “Uber dan Grab diatu empai bisi orang megai dibanding enggau teksi, nya kebuah bisi penanggul,” ku iya. #UtusanBorneo

    No comments

    Post Top Ad