Header Ads

  • Berita Tebaru

    Siku lelaki betapi ukum jil, lunsin pengudah dituduh masung nembiak

    GAMBAR ARI FACEBOOK: Suspek udah kena tangkap raban Polis.
    KOTA SAMARAHAN: Siku orang ti nadai bekereja betapi enggau ukum lepas dituduh masung nembiak pom dua ba Kort Seksyen Kota Samarahan, ditu kemari.

    Tuduh nya ditapi Barry Hunter Jaem, 24, ari Serian, dibacha ba mua Pengerijester kort Kota Samarahan, Aida Montong netapka 23 Januari tu haribulan endur kes nya disebut baru.

    Lelaki ke dituduh nya didawa nitihka Seksyen 376(2) (d) Kanun Keseksaan ke ngundan ukum enda ngelui 20 taun jil enggau lunsin laban masung nembiak kelalu biak.

    Aida mega ngasuh tetuduh diikat jamin penyampau RM3,000 enggau dua iku penjamin ke diau sereta sama alamat ba Serian enggau gaji pemadu baruh RM1,500 siku.

    Tang, tetuduh puntan ngiga penjamin ngujungka iya ditan nyentuk haribulan kes nya disebut baru.

    NGANTI BECHARA BARU : Tetuduh sempat berandau enggau apai iya sebedau dibai polis ngagai lokap.

    Bepelasarka penerang kes, indai nembiak nya datai ngaga ripot polis pukul 4.15 lemai 7 Januari tu tadi, pengudah anak iya ngaku kala beleman enggau pangan iya, ke diau sama semua ba Serian.

    Pekara nya dipadahka nyadi dua kali kena bulan Julai 2016 ba dua bengkah endur iya nya ba rumah saspek di Kampung Koran Barie enggau ba Taman Rekreasi Ranchan, Serian.

    Nembiak ke bebansa Bidayuh nya madah diri kena pejal sereta diemba sebedau beleman.

    Tambah mega, tetuduh suah tama belalai ngagai rumah sida, lebuh maya iya deka ngayap.

    Berindik ari ripot nya saspek ditangkan kena 8 Januari tu tadi.

    Nembiak nya udah dibai beperesa pengerai ba Sepital Besai Sarawak lalu amat bisi charik ba pemalu iya.

    Pengawa bedawa tu diarika Sapit Pendawa Raya Ahmad Fariz Abdul Hamid lalu tetuduh datai diuluka sida sebilik tang nadai diarika luyar. #UtusanBorneo

    No comments

    Post Top Ad