Header Ads

  • Berita Tebaru

    SRDC numbuhka komiti nyaup ngurangka penyalah muai uras

    Sempurai Petrus Ngelai
    SIBU: Opis Kaunsil Menua Pesisir Sibu (SRDC) ngaga pemutus numbuhka sebengkah komiti ti deka bekerejasama enggau komiti genturung pendiau dikena ngurangka agi penyalah muai uras sengapa.

    Chairman SRDC Sempurai Petrus Ngelai madah, iya enda lantang ati meda penyalah nya ti suah agi dikereja ba Sibu Jaya.

    Iya madah, uras baka uras ari industri tauka laluh dikena ngaga rumah dibuai sengapa alai baka ba tisi jalai tauka ba ujung jalai.

    “Kitai udah berandau enggau bala kaunsilor ba endur nya sereta enggau Seksyen Pengerai Rama lalu numbuhka siti komiti ti deka begulai enggau komiti genturung pendiau.

    “Komiti tu deka nyadi pending enggau mata piak kitai beratika penyalah tu.

    “Kelimpah ari nya, kitai mega udah nganjung notis ngagai sida ke beempu indus tri ngambika enda bebuaika uras sida ba sengapa alai,” pia ku iya madah ngagai pengarang berita, kilah ensana.

    Iya mantaika jaku nya maya ditanya sentang penyalah uras dibuai sengapa alai ba menua ke dipegai SRDC.

    Sempurai madah, naka ke diatu, piak sida nengah unit penerit adat enggau Pengerai Rama agi ba tikas ngumpul penerang tauka pengamat sapa bagi muai uras ari industri tauka kereban rumah baka bangku tauka mija lama ba endur ti enda dikemendarka.

    “Enti ditemu sengaja muai uras sengapa alai, SRDC deka ngukum kita RM500,” ku iya madah baru.

    Taja pan baka nya, Sempurai madahka diatu ke beguna iya nya ngaga chara ke ulih dikena mutarka penyalah nya ba timpuh ke lama.

    “Ambika banding kitai meseti nangkan mensia mayuh ngambika sida enda bebuaika uras ba tisi jalai tauka ba endur ti ukai palan muai uras.

    “Ulah mereti meseti bepun ari kitai apai indai lalu deka ditunda bala anak.

    “Pia mega, bala tuai raban bansa enggau pengari rayat bela patut bisi chara ke diri empu ngembing rayat nyengkaum ba ulah ngintu pemeresi kandang menua baka tu,” pia ku iya madah. #UtusanBorneo

    No comments

    Post Top Ad