Header Ads

  • Berita Tebaru

    Staf perintah patut nerenakka integriti bejalaika pengawa

    SUMPAH KAMI: Charles betuaika bala bukai macha ikrar seraya dikemata Talip (dua kanan) maya Majlis Ikrar Bebas Rasuah (IBR) ditu, kemari.
    SIBU: Genap iku sida ke gawa perintah ba nengeri tu meseti nanggam integriti ti nyadika chara dikena nyeliahka diri ari penyalah makai suap.

    Menteri Muda ba Opis Kepala Menteri (Integriti enggau Ombudsman) Datuk Talib Zulpilip madah, ke batang bendar semua sida ke gawa perintah enda patut ngereja penyalah nya tauka salah ngena kuasa sida.

    “Pia mega sida ke bisi bekaul enggau pengawa ngaga projek meseti nagang diri ari ke amu ngiga penguntung muntang.

    “Pengawa kita iya nya ngemujurka tanggungpengawa ke udah diberi ukai beambi ulih ari projek ke digaga ungkup pengelantang rayat,” pia ku iya madah.

    Iya bejaku munyi tu maya ngulu Majlis Ikrar Bebas Rasuah (IBR) ungkup orang gawa perintah ditu, kemari.

    Residen Sibu Charles Siaw ngetuaika urung 400 bala bukai ari macham bengkah ejensi enggau opis perintah Sibu.

    Ku iya, sida ti bejalaika pengawa bepelasarka integriti sereta nitihka undang-undang nadai berasai nangi.

    “Niang Kepala Menteri kitai Pehin Sri Adenan Satem ngepunka pengawa besemaya likun ari makai suap sereta integriti sebedau dititihka bala bukai ba opis perintah.

    “Iya ngamatka semaya iya lalu kitai mega meseti nitihka ulah tu ngambika likun ari penyalah makai suap tauka salah ngena kuasa.

    “Kitai mega meda iya nagang diri sebilik enggau iya empu ari ngereja pengawa ba industri kebun sawit enggau kayu,” ku iya madah baru.

    Talib madah, ulah niang Adenan mega ditandu Kepala Menteri ke diatu Datuk Patinggi Abang Johari Tun Openg ngerekaika integriti ba orang gawa perintah nengeri tu.

    Dulu agi ari tu, Charles ba jaku iya madah, orang gawa perintah dilempaika perintah ngadu sereta bejadi polisi perintah enggau ngemujurka projek tauka program ungkup rayat.

    “Integriti siti ari pengering kitai bejalaika pengawa perintah.

    “Nya alai, integriti meseti dikembuan kitai dikena ngemujurka tanggungpengawa ke udah diberi,” pia ku iya.

    Sama bela datai maya tu iya nya Pemesai Opis Penagang Makai Suap Malaysia (SPRM) Rasimah Asdari. #UtusanBorneo

    No comments

    Post Top Ad