Header Ads

  • Berita Tebaru

    Staf STB meseti kreatif ngelakuka produk dagang temuai

    Datuk Abdul Karim Rahman Hamzah
    KUCHING: Pengelandik staf Kaunsil Dagang Temuai Sarawak (STB) ngiga peluang ngereja pengawa ngelui ari skop kereja sereta bediri ba baris mua, ulih ngubah industri dagang temuai ngagai renggat tinggi agi.

    Menteri Dagang Temuai, Seni, Main Asal, Nembiak & Lumba enggau Main Datuk Abdul Karim Rahman Hamzah meransang pengereja pengawa opis nya ngambika lebih kreatif baka ba pengawa ngelakuka produk dagang temuai.

    “Semua kita (pengereja pengawa STB) diberi tanggungpengawa lalu opis menteri enggau ejensi deka nyukung ba pengawa kita ngelakuka produk.

    “Kita patut nyadi orang ke lebih kreatif dalam pengawa ngelakuka produk, lalu digital pelasar ti nyendiaka mayuh pilih sereta nadai sekat endur ngelakuka palan dagang temuai lalu STB patut nguna peluang nya,” ku iya.

    Iya meri peransang nya lebuh ti keterubah betemu enggau pengeraja pengawa STB kenyau iya nyadi menteri nya.

    Ku iya, industri nya diatu bisi ngayanka pemansang nyengkaum ba pengawa nempa kaul tauka kerejasama enggau menua luar, lalu pekara nya patut dipajakka.

    Iya muji sereta temegah ati meda kaul kereja ti nguntungka pengemeran industri nyengkaum ejen, kompeni penerebai, pengempu hotel sereta pengempu produk ti dikearapka ulih terus ngangkatka industri.

    “Kita (STB) mega ulih nempa kerejasama enggau Biro Konvensyen Sarawak ba pengawa ngangkatka sektor dagang temuai - pengawa dagang ti nguntungka seraya ti ngena chara baru iya nya digital dikena ngelakuka industri ngagai tikas ke lebih tinggi,” ku iya.

    Nyempulang Karim nemuai ngagai STB nya, Sekretari Mendam opis menteri Hii Chang Kee.

    Maya baum nya Karim diberi penerang bekaul enggau STB sereta pasal pengereja pengawa kelimpah ari langkar ngelakuka produk dagang temuai jemah ila.

    Iya madahka diri temegah ati laban lumba enggau main ti diperambu diatur taun baru ulih meri peluang endur ngangkat seraya ngelakuka dagang temuai nengeri.

    Kelimpah ari nya Karim enggau gaga ati madahka penyampau temuai ke datai ke Sarawak naka bulan November 2017 bisi 4,427,539 iku temuai ti ngayanka nambahka 6.5 peratus ari taun sebedau nya.

    “Kami gaga ati enti ulih tejapaika juluk lima juta iku temuai tang taun tu juluk ti ditetapka ba kami empu iya nya 5.2 juta iku temuai,” ku iya.

    Sama bisi datai Chairman STB Datuk Abdul Wahab Aziz sereta Ketuai Tetinggi Pemesai Eksekutif STB, Mary Wan Mering. #UtusanBorneo

    No comments

    Post Top Ad