SUPP deka mutarka penanggul arus penyambung di Jalai Salim-Stabau enggau lengkas -->
Cari Berita

Advertisement

SUPP deka mutarka penanggul arus penyambung di Jalai Salim-Stabau enggau lengkas

Admin | beritaiban@gmail.com
January 23, 2018

Joseph Chieng
SIBU: Penanggul nadai kena bungkur arus penyambung di menua Jalai Salim-Stabau ti semina 15 minit penyauh pejalai ari indu mengeri nerima perati ari Parti Sa’ati Rayat Sarawak (SUPP).

Siku ari chalun ditaga ulih menang SUPP ba penuduk Parlimen Lanang Kunsilor Joseph Chieng madahka penanggul nya udah nyadi kenyau ari sepuluh taun ke udah lalu nadai kala diputar.

“Kandang menua ke disebut aku iya nya ari Nanga Salim nyentuk Jematan Durin di Jalai Salim-Stabau tauka dikelala ngena nama Jalai Kong Yit Khim.

“Sambung internet enggau bungkur arus penyambung di menua nya lubah endar. Pekara ngasuh kitai alit ati, menua tu semina 15 minit aja pejalai ari indu mengeri,” ku iya madah ngagai pengarang berita ditu, kemari.

Ku iya, kandang menua tu mega diuwan mayuh peranak lalu bisi sekula, rumah panjai, genturung pendiau, palan industri ngaga kapal, industri berat enggau ke bukai, sereta begunaka arus penyambung.

Berintik ari penanggul nya ngujungka bungkur arus penyambung di sepanjai Jalai Salim-Stabau lemi endar dataika peranak dia sebana sereta nyima ngumbai diri idup dalam “ekscommunicado”.

Chieng ke mega Ketuai Nembiak SUPP Pampang Bukit Assek madahka peranak dia majak ringat laban sida diau semak mengeri tang perengka guna nya enda ulih disedia.

“Aku empu udah kala kia lalu nemu baka ni gaya penanggul ditapi sida.

“Uji perati, enti sema bisi penusah ngenyit lalu telefon binching enggau ulih dikena, tu nyadi siti penanggul besai.

“Arus penyambung beguna endar kemaya hari,” ku iya.

Ku iya, sida ke diau di menua suah mantaika sebana pasal penanggul tu tang puntan penemu.

Dikena mutarka penanggul tu, Chieng nguluka seraban peranak di Jalai Salim-Stabau ngelawa Opis Telekom Malaysia, Sibu enggau opis Suruhanjaya Komunikasi dan Multimedia Malaysia (SKMM) Sibu mantaika sebana sereta jalai dikena mutarka penanggul nya, apin lama ke udah.

“Petisyen ti udah disain urung 200 iku peranak udah dianjung kami ngagai opis SKMM di Sibu. Kami mega udah nganjung salin surat nya ngagai Kepala Menteri Datuk Patinggi Abang Johari Tun Abang Openg ngambi mutarka penanggul nya enggau naka penyampat,” ku iya nandu nyemetak.

Ku iya, Presiden SUPP Datuk Dr Sim Kui Hian bisi di Sibu kemari lalu iya deka diterang pasal pekara nya ngambika ulih nyadi orang tengah sereta ngarika peranak Jalai Salim-Stabau mantu ngulihka perengka guna ari raban bekaul.

“Kami sedia mutarka penanggul ti nyadi perengka diguna peranak ditu. Sida enda patut diteju pia aja ari ngasaika perengka guna arus penyambung ti meruan,” ku iya nandu. #UtusanBorneo