Header Ads

  • Berita Tebaru

    SUPP enggau UPP patut berundingka formula baru ke pemaik kededua piak, ku Tan

    Temenggong Tan Joo Phoi
    KUCHING: Temenggong Tan Joo Phoi madahka endang enda ulih ngandalka begulai sebilik antara Parti Sa’ati Rayat Sarawak (SUPP) enggau Parti Rakyat Bersatu (UPP).

    Ba penemu iya, komuniti China enda deka meda SUPP, nyadi parti politik pemadu tuai di Sarawak, sebilik enggau UPP lalu nyadi parti politik ke baru.

    “Enda patut kitai deka meda parti politik baru ada ketegal begulaika SUPP enggau UPP.

    “SUPP enda ulih dipegulai enggau parti bukai lalu patut ngubah nama ngagai ke baru, tu ukai pekara ti deka dipeda komuniti China,” ku iya lebuh ditanya pengarang berita pengudah ngulu program di sebengkah palan bebelika barang ditu.

    Tan, ke nyadi ex-menteri muda, ex-Kaban Kunsil Nengeri (ADUN) Batu Kawa lalu diatu nyadi kaban bukai SUPP, ngasaika deka meruan agi gawa ngagai individu ti udah meleka ari SUPP, nikal pulai baru ngagai SUPP.

    Ku iya, komuniti China seruran dekaka kededua parti politik bansa China nejuka bida sida lalu begempung nyadi siti gempung ti tegap.

    Ku iya nambah, pekara tu nyadi pemerat bansa China, nitihka pematut bisi pengari dalam perintah.

    “Aku ngarapka bala ketuai ba kededua parti berunding memanah sereta nipan baru semua isu lalu begulai gawa ungkup komuniti China,” ku iya.

    Ku Tan, manah endar bala ketuai ari SUPP enggau UPP berandauka formula ngambika bebaik sereta berat ba pengawa ke patut dikereja ungkup komuniti China.

    Pasal tanya, ku iya, iya ngarapka bala ketuai kededua parti deka ngatur randau, betunga mua, bejurai nyapai setuju enggau pangan diri.

    “Tu dikena sida ngiga pemutar, lalu aku pechaya penyerakup nyadika pengering komuniti China,” ku iya nambah. #UtusanBorneo

    No comments

    Post Top Ad