Header Ads

  • Berita Tebaru

    Teras agi idup, Mawan agi mayuh penyukung, ku Banyi

    Banyi Beriak
    SARATOK: Sekretari Besai Parti Tenaga Rakyat Sarawak (Teras) Banyi Beriak ngenanka parti iya ke dipadah enda beoperasi agi.

    Banyi madahka diri asa ati enggau Parti Progresif Demokratik (PDP) ti ma dahka Teras udah direrak taja pan ditu benung nyendiaka diri ngatur Aum Besai Tiga Taun Sekali ke deka diatur (TGM) dalam bulan Mac tu ila.

    Tuduh PDP nya tau dipadahka deka ngachau parti sereta ngusak penuduk MP Saratok, Tan Sri William Mawan, ku iya.

    Banyi ke mega chairman pampang Teras Krian madahka bisi 3600 iku kaban Teras Krian ke bediri dibelakang nyukung Mawan ti deka nentuka iya dichalun Barisan Nasional (BN) baru, ngenanka Saratok iba pengawa bepilih besai ke deka datai.

    Kelimpah ari 3,600 iku penyukung Teras di Krian, Banyi mega madahka bisi lebih 3,000 iku penyukung Teras di Kalaka enggau Kabong.

    Ku Banyi, sida tu mih penyukung kuat Mawan ti direjista nengah iya empu maya Mawan agi nyadi presiden Teras.

    “Sida tu sedia nyukung Mawan ti dipeda nengah mayuh bengkah pengerami ke bisi diatur nyentuk ke diatu.”

    Lebuh ke nimbal pasal bantah ba politik Mawan, Banyi madahka Mawan diempu indai parti politik BN.

    “YB Tan Sri (Mawan) udah suah disebut orang ‘nadai parti’ tang ke bendar iya diempu indai semua parti, iya nya BN. Iya udah ngintu rayat di Saratok pengelama ngelui ari empat taun. Iya nadai kala muji diri ba pemujur pengawa ti udah digaga iya.

    “Pemujur ke diulih iya semua nya ungkup rayat ngambika bisi dipeda sereta diasaika sida, ukai ungkup dipanjungka iya. Ungkup peranak di Krian, YB Tan Sri begegadai ngubah runding enggau ulah rayat ngiring sida nuju BN.

    “Ngagai sesapa ke ngelaban sebedau tu, diatu ulih nerima parti BN ke mayuh udah mai ubah ngagai Saratok nengah iya (Mawan). Majorityi peranak Krian diatu udah nyukung BN baru. Teras bekaban enggau BN meri sukung ke penuh ngaga YB Tan Sri di Saratok. Peny ampau kaban ke berejista ke lebih agi di Krian mega majak nambah,” ku Banyi.

    Banyi mega arapka Mawan dichalunka BN baru ngenanka sitak Saratok ba PRU14 tu ila.

    “Manah agi anang nyilih deriba ti ulih mansang laju ke mua sereta ke ulih ngenanka peneras singkang,” ku iya madah.

    “YB Tan Sri ditukuka siku MP ti regas sereta chakah gawa. Iya udah mai pemansang ngagai Saratok enggau rayat kenyau ari hari keterubah iya nyadi MP. Iya udah diberi gelar basa ari JASA dalam taun 2014,” ku iya.

    Ku Banyi, iya ukai ngelaban sesapa ti ngelakuka diri nengah tikit BN, tang Mawan nengah pengawa ngelakuka konsep BN setipak endar enggau rayat kelebih ari dalam penemu politik di Saratok. Kelimpah ari nya, Mawan udah mujur ngambi ati rayat di Krian, ku iya nambah.

    Krian siti ari sitak kunsil nengeri dalam parlimen Saratok.Dua ke bukai iya nya Kalaka enggau Kabong ke alai kededua nya nyadi kubu kuat BN. Diatu Krian dikuasa penyakal, Parti Keadilan Rakyat (PKR) nengah Ali Biju.

    Banyi mantaika penemu tu ngenang Dr James Chella enggau orang dagang, Subeng Mula seduai Basil Thomas ke benung ngelakuka diri nyadi chalun nengah tikit BN. #UtusanBorneo

    No comments

    Post Top Ad