Header Ads

  • Berita Tebaru

    Tiga iku indu alah ditipu meli kerita

    Suprintendan Mohd Bukhori Saffai
    LIMBANG: Siku lelaki nawa staf sebuah sebuah serikat entukar ke bepengkalan ba Miri nipu tiga iku indu ba pengawa meli kerita ngujungka rugi manggai RM10,000.

    Ketetiga indu tu beumur 23 ngagai 30 taun gawa nyadi pelayan kedai makai ba Lawas enggau Limbang ditipu saspek nyengkaum sida puntan menggi kerita ke dikeingin.

    Udah nemu diri kena tipu, sida ngaga ripot ba palan ke bebida bekaul enggau saspek kena Mei enggau Ogos 2016.

    Ketuai Polis Pelilih Limbang, Suprintendan Mohd Bukhori Saffai madah, ripot keterubah digaga indu nya ke beumur, 26 taun ari Desa Pabahanan Limbang pukul 3.40 lemai Mei taun nyin kemari.

    “Indu keterubah ditipu saspek bekaul enggau pengawa meli sebuah kerita lalu mayar duit chengkeram RM2,000 lalu RM1,000 agi ditepu ngagai akaun saspek,” ku iya madah ditu kemari.

    Iya madah siku agi sida ke ditipu ari Kampung Long Tuma Lawas, 23, mega nepu duit chengkeram RM1,250 ngagai akaun saspek nengah dua transaksyen.

    “Indu nya nepu duit ngagai akaun saspek dikena iya meli sebuah kerita.”

    Bela ditipu siku agi indu ke beumur 30, ari Kampung Bangkatan Merapok, Lawas rugi RM4,100 pengudah ngatur pengawa meli kerita ari saspek.

    Mohd Bukhori madha, pengudah nerima semua bayar nya, bala indu tu puntan bulih kerita baka ke udah disemaya nyentuk ke sehari tu.

    Ku iya, ketetiga indu nya bisi betelefon nuju saspek ti besemata deka mulaika duit sida.

    Taja pia, naka ripot tu digaga semua sida nadai nerima duit chengkeram enggau kerita ke udah disemaya.

    Kes dipansik nitihka Seksyen 420 Kanun Keseksaan. #UtusanBorneo

    No comments

    Post Top Ad