Header Ads

  • Berita Tebaru

    Tiga sekula di Baram, Subis agi ditutup ketegal ampuh bah

    AMPUH BAH: SK Kuala Bok Tinjar
    MIRI: Tiga buah sekula di bagi menua Baram enggau Subis agi ditutup berindik ari tikas ai majak niki antara dua ngagai tiga inchi dibanding kemari.

    Antara sekula kena penusah tu iya nya Sekula Primari (SK) Bok Tinjar, SK Sungai Baong Baram enggau SK Rumah Ranggong, Subis.

    Ripot Opis Bomba enggau Penyah Penusah Marudi madahka SK Bok ditutup ketegal tikas peninggi ai majak niki iya nya urung tiga inchi dibanding hari sebedau nya.

    Naka pukul 8 pagi kemari, kandang menua tepekul nyengkaum balai gempuru ditiki ai 2.5 kaki penalam, padang sekula (4.5 kaki penalam), enggau baruh rumah pengajar (2.7 kaki penalam).

    Sama ampuh iya nya kelas primari tiga, empat, lima enggau enam, 1.8 nyentuk 2 kaki penalam.

    Tikas ai niki ngenyit ketegal ujan bangat kemari tang nadai sebarang penusah bukai bisi diripot nyadi sekumbang penusah nya.

    SK Bok ke ditutp nya ngembuan 62 iku nembiak enggau 12 iku pengajar, lapan iku AKP sereta 15 iku bala staf enggau sida sebilik.

    Komiti Mutarka Penusah Ngenyit Nengeri bela madahka SK Sungai Baong, Baram mega diripot ditutup enggau tikas ai niki tiga inchi penalam.

    Antara endur ke ampuh iya nya padang sekula 3.2 kaki, kelas primari satu, dua, tiga enggau empat penalam 1.7 kaki.

    Kepala Pengajar sekula nya mega udah minta pemendar sekula nya ditutup ke pengelikun bala nembiak. Pengawa nutup sekula nya ngaul 122 iku nembiak enggau 13 iku pengajar.

    Berebak enggau nya SK Rumah Ranggong, Subis ti ngembuan 92 iku nembiak enggau 13 iku pengajar mega ditutup ketegal jalai ngelawa sekula ampuh.

    Ripot mega madahka semua pengajar enggau staf enda ulih ngelawa sekula ketegal jalai tepekul ba sekeda endur. #UtusanBorneo

    No comments

    Post Top Ad