Tujuh sitak deka diperesi ari dadah nengah kimpin PDH 3.0 -->
Cari Berita

Advertisement

Tujuh sitak deka diperesi ari dadah nengah kimpin PDH 3.0

Admin | beritaiban@gmail.com
January 23, 2018

BESEMAYA: Wan Madihi (tengah) nguluka bala pengereja pengawa AADK macha danji deka munaska dadah di Sarawak.
KUCHING: Tujuh bengkah sitak di Sarawak deka diperesi ari penanggul bekaul enggau dadah lalu nyadi pemerat Ejensi Anti Dadah Kebangsaan (AADK) lebuh sida iya deka berengkah bejalaika kimpin ‘Perangi Dadah Habis-habisan’ (PDH) 3.0 taun tu.

Direktor AADK Sarawak Wan Madihi Wan Salleh madah, tujuh sitak nya mungkur Kuching, Gita, Sri Aman, Samarahan, Miri-Lawas, Bintulu enggau Sibu-Sarikei, ke deka ngena penegap urung 224 raban AADK di serata menua bejalaika kimpin nya.

“Beserimbai enggau kimpin nya taun tu, AADK milih tujuh sitak alai bejalaika kimpin PDH 3.0, ke nyadi pemerat kami sereta menua tu, ngemunaska pengawa makai dadah ba entara rayat menua tu,” ku Wan Madihi.

Iya madah munyi nya lebuh bejaku ba aum media pengudah ngepunka gempuru AADK Sarawak di Auditorium Begunan Sultan Iskandar, Simpang Tiga, ditu, kemari.

Berebak enggau tujuh sitak nya, siti ari sitak nya, Bandaraya Kuching, deka mungkur sitak Samariang, Tabuan enggau Kuching Waterfront, lalu di sitak Gita, deka mungkur Matang enggau Batu Kawa, Sri Aman mungkur sitak Hulu, Hilir enggau Pasir Panas, Kota Samarahan, Miri-Lawas mungkur sitak Tudan, Bekenu, enggau Sundar Miri-Limbang.

Di pelilih menua Bintulu ku iya, mungkur sitak Jepak, Asyakirin, Bandar Bintulu, Kampung Sebiew Jalai Bintulu-Miri lalu di Pelilih Menua Sibu-Sarikei mungkur Kampung Dato, Kampung Nangka, Sibu Jaya enggau Kampung Pahlawan,ku iya.

“Bekait enggau statistik sida ke kena tangkap makai dadah, ba taun 2017, urung 466 sida ke gian dadah ditangkap nengah 305 operasi ti dipejalaika di serata menua.

“Mayuh penagih dadah ke ditangkap nya, ditemu positif dadah bansa syabu,” ku iya.

Iya nandu baru madahka penyampau sida ke gian dadah ke kena tangkap majak nambah dibanding enggau penyampau 143 ba taun 2016.

Kelimpah ari nya, iya madah AADK Sarawak mega bisi bejalaika urung 414 program ke digulu ulih ruang bilik, sekula, endur gawa sereta komuniti di serata menua tu.

“Nya alai, kami deka majakka pengawa kami ngemunaska pengawa makai dadah, kelebih agi nadai tetemuka penagih baru tauka penagih ke kala kena tangkap suba, lalu mulaika pengawa makai dadah baru tauka pengawa bejualka dadah, dikemunaska sekali,” ku iya. #UtusanBorneo