Uggah deka dipebasa bejadi konferen pasal betanam digital -->
Cari Berita

Advertisement

Uggah deka dipebasa bejadi konferen pasal betanam digital

Admin | beritaiban@gmail.com
January 24, 2018

Datuk Amar Douglas Uggah Embas
KUCHING: Sapit Kepala Menteri Datuk Amar Douglas Uggah Embas, ke mega Menteri Betanam Betupi Moden, Tanah Adat enggau Pemansang Kandang Menua, udah dikangau datai bejadika konferen pasal betanam digital Gerempung Bansa Dayak Sarawak (SDNU).

SDNU enda lama agi deka ngatur pengawa ngelancharka program ngelakuka betanam digital iya ungkup komuniti menua pesisir bekerejasama enggau opis menteri Uggah.

Uggah deka dikangau bejadika pengawa muka konferen sereta mansutka pugu jaku bekaul enggau pengawa betanam, pia ku SDNU nengah penerang berita, kemari.

Sekeda keretas kereja bekaul enggau pengawa betanam enggau aplikasyen teknologi digital deka dibantaika maya atur konferen ari bala speaker ti landik sereta bepeneleba dalam teknologi digital, pia ku Presiden SDNU Tan Sri William Mawan Ikom madah dalam penerang berita nya kemari.

Konferen ti deka diatur di Sarikei lalu deka digulu bala kaban SDNU ari serata nengeri sereta mega pedagang di menua tu, nyadi pengawa besai reti ngagai SDNU enggau komuniti bumai menua pesisir laban iya nyadi peransang ngagai pemansang pengawa betanam.

Komiti Eksekutif SDNU deka baum kena 11 Febuari 2018 ngambi ngerintaika program enggau perambu ungkup konferen nya.

Mawan mansutka jaku tu nimbal penerang media ari Uggah ti ngelaluka inisiatif SDNU ngelakuka teknologi digital ngagai komuniti bekebun menua pesisir.

Uggah bisi nyebut opis menteri iya nyukung pelin SDNU lalu deka meri sukung enggau kerejasama ti patut nentuka pemujur iya dalam ngubah runding komuniti menua pesisir sereta nyungkak produktiviti ekonomi.

Uggah nyebut madahka SDNU udah bisi pangku pengawa beguna endar bejalaika kerejasama enggau opis menteri iya, ngelangkar startegi enggau pelin pengawa dikena ngajar enggau ngelatih orang bumai menua pesisir ba pengawa betanam sereta ngena aplikasyen teknologi digital bukai ti bekaul.

Mawan, ke nyadi Kaban Parlimen (MP) Saratok enggau Kaban Kunsil Nengeri (ADUN) Pakan, sepenemu enggau Uggah ke alai pengawa ngubah runding orang bumai menua pesisir sereta ngubah pengawa sida ba betanam ti napi pemar sereta begunaka program ti engkeman enggau interasyen.

Ku iya nambah, SDNU, enggau rentayan kereja sereta nengeri datai ari lebih 60,000 iku kaban, udah nyediaka diri ngepunka pengawa napi pemar nangkup pengawa perintah Nengeri ngubah komuniti betanam menua pesisir.

Mawan nyemetak madah pelin SDNU deka nyaup pengawa Perintah Sarawak di baruh pegai Kepala Menteri Datuk Patinggi Abang Johari Tun Abang Openg dalam ngenyampatka pengawa bekenaka aplikasyen digital di semua sektor pengerembai besai enggau semua ekonomi komuniti sereta meransang pemansang ngagai tikas ke baru.

Tu ku iya, deka ngasuh SDNU enggau bala komuniti bejalaika pengawa seriris enggau teras perintah ba teknologi digital.

“Nyadi NGO, enggau mayuh bala kaban datai ari menua pesisir, diau ngachir di nengeri tu, SDNU keran bejalaika pangku pengawa nyadi bakih ba pemansang dikena nyaup perintah Sarawak ngemajuka kebuah teknologi digital sereta mantu ngubah ekonomi menua pesisir,” ku Mawan. #UtusanBorneo