Header Ads

  • Berita Tebaru

    Ulah PH ngelaguka nama Tun Mahathir nyadi chalun PM semina kena nginti undi

    Dennis Ngau
    MIRI: Ulah Pakatan Harapan (PH) ngelaguka nama Tun Dr Mahathir Mohamad nyadi chalun Menteri Besai (PM) semina chara dikena nginti undi maya Pengawa Bepilih Besai Ke-14 (PRU14).

    Kaban Kunsil Nengeri (ADUN) Telang Usan, Dennis Ngau madahka Tun Dr Mahathir semina nyadi gasing ngagai PH dikena nginti undi rayat.

    “Rayat enda ulih bejudika pengidup sida enggau sepeneka nukar perintah laban sida patut belajar ari sejarah enggau pengilap suba,” ku iya madah ngagai Utusan Borneo kemari.

    Ku Dennis pengawa PH ngirai nama Tun Dr Mahathir nyadi chalun Menteri Besai iya nya siti chara dikena numbangka Barisan Nasional (BN).

    “Tun Dr Mahathir suah udah ngaga pengilap lalu mai pengerugi ngagai menua iya nya dagang mata wang menua luar.

    Sarawak mega jauh tinggal ari sukut infrastruktur dibanding nengeri ke bukai laban iya empu jarang beratika peminta rayat Sarawak,” ku iya nyemetak.

    Ku Dennis nambah, BN di baruh pegai Menteri Besai Datuk Seri Najib Tun Razak ngembuan rekod manah enggau Sarawak.

    Tambah mega, Najib ngatur pejalai ngabas Sarawak lebih ari 50 kali dibanding Tun Dr Mahathir lalu tetiap kali penemuai iya ngemai berita manah ngagai Sarawak.

    “Aku nadai meda pengering Tun Dr Mahathir di Sarawak laban jasa iya ngagai Sarawak enda entu besai dibanding Najib ti keran ngemansangka Sarawak,” ku iya.

    Ku Dennis, Najib mega udah empat kali nemuai ke Baram sereta udah ngemendarka bemacham projek enggau bantu ungkup rayat.

    “Najib semina 10 taun aja udah nyadi Menteri besai, udah ngemai pemansang ngagai Sarawak seraya Tun Dr Mahathir megai menua pengelama 22 taun tang pengawa iya kurang endar,” ku iya nandu.

    Dennis madahka Sarawak deka meruan nyadi kubu kuat BN sereta meri pemenang besai dikena nempa perintah di baruh pegai BN. #UtusanBorneo

    No comments

    Post Top Ad