Ulih bepolitik tang anang sampai ngelanggar atur -->
Cari Berita

Advertisement

Ulih bepolitik tang anang sampai ngelanggar atur

Admin | beritaiban@gmail.com
January 23, 2018

Tan Sri Zainal Rahim Seman
Orang ti gawa perintah dikemendar bepolitik asal nya enda ngeruga tanggungpengawa sida.

KUCHING: Ketuai Direktor Opis Pengereja Pengawa Perintah Malaysia Tan Sri Zainal Rahim Seman netapka orang gawa perintah tau bepolitik tang meseti nitihka penetap.

Bejaku ba aum pengarang berita di Kuching kemari, iya madah pekara nya dikemendar enti enda ngeruga tanggungpengawa sida ke nyadi pengereja pengawa perintah.

“Tau bepolitik, asal aja enda ngelanggar atur servis pengawa perintah sereta nyaga akta rahsia rasmi perintah.

“Kitai nadai penanggul ba pekara nya tang sida meseti dulu minta pemendar ari ketuai,”ku iya.

Dulu agi ari nya Zainal ngulu ‘Wacana-Jelajah Transformasi Nasional 50 (TN50)’ ke diatur di Dewan Undangan Nengeri (DUN) Lama, Petra Jaya ditu.

Program bela digulu Sekretari Perintah Sarawak Tan Sri Datuk Amar Morshidi Abdul Ghani enggau Presiden CUEPACS Datuk Azih Muda.

Ngenang sentang pemesai pelajar tauka raban pengajar ti deka bepolitik iya madah sida meseti minta pemendar ari ketuai sekretari opis nya.

“Tang bisi penetap pekara tu diikemendar, kitai nagang pemesai pelajar mangku pengawa ba dalam parti politik.

“Bisi chara tang baka ke suah bisi mega undang-undang. Enti ditemu ngelanggar, sida tau diukum lalu tu nyadika chara kitai matau,” ku iya. #UtusanBorneo