Header Ads

  • Berita Tebaru

    Wong andal chalun bepenau UPP ulih menang ba Sibu enggau Lanang

    Dato Sri Wong Soon Koh
    SIBU: Presiden Parti Rakyat Bersatu (UPP) Dato Sri Wong Soon Koh andal chalun bepenau ari parti nya ngembuan peluang besai bediri ba penuduk Parlimen Sibu enggau Lanang maya Pengawa Bepilih Besai Ke-14 (PRU14) tu ila.

    Nitihku Wong, iya udah betemu enggau Menteri Besai Datuk Seri Najib Tun Razak sereta Kepala Menteri Datuk Patinggi Abang Johari Tun Openg apin lama ke udah bekaul enggau pekara nya.

    “Aku meri jamin ngagai Menteri Besai enggau Kepala Menteri, nyema penuduk Parlimen Sibu enggau Lanang diberi ngagai UPP, kitai ulih mantu menang ba penuduk nya ungkup Barisan Nasional (BN).

    “Aku mega deka madah ngagai Menteri Besai kitai bisi pengering ba Sibu enggau Lanang.

    “Kitai bisi penatai pengering enggau wang dikena mantu menang ba penudik nya ungkup BN,” ku iya rambau Pengerami Ngintu Taun Baru 2018 diatur Unit Bumiputera UPP Bawang Assan, malam ensanus.

    Sama bisi datai chalun bepenau UPP ungkup penuduk Parlimen Sibu enggau Lanang, Datuk Andrew Wong enggau Andrew Ting, Temenggung Stanley Geramong, Pemancha James Semilan, Penghulu Jeffery Sut, Penghulu Evelyn Holly Sebom sereta chairman pengatur Andrew Shilling.

    Wong ke mega Menteri Wangan enggau Perambu Ekonomi Kedua madah, maya pengawa nya Menteri Besai bisi madah iya deka meda UPP enggau Parti Sa’ati Rayat Sarawak (SUPP) besaup.

    “Menteri Besai mega udah minta Kepala Menteri ngiga jalai baka ni ngasuh kededua parti tu besaup mantu pangan diri ba serata Sarawak.

    “Kedua, Menteri Besai mega madah iya semina deka meda chalun bepenau menang bediri ba PRU14 tu ila,” ku tandu Wong.

    Enggau jaku dipansutka Menteri Besai nya, Wong madahka pengandal UPP bisi peluang besai bediri ba Sibu.

    Tang taja pia, kenu ku Menteri Dagang Antarabansa enggau E-Dagang nya, pemutus bepanggai ba Menteri Besai enggau Kepala Menteri.

    “Minggu ke udah, aku bisi berandau enggau Kepala Menteri lalu iya meri jamin UPP deka diberi peluang nyema kitai bebendar lalu ngembuan chalun ke ulih menang,” ku iya.

    Berindik ari nya, Wong ngelalau semua kaban UPP lebih agi kaban Bumiputera patut terus meri sukung sereta mantu kededua chalun nya.

    Kebuah pia, ku iya kededua chalun bepaun nya ngembuan perambu ke besai ba kandang mengeri enggau menua pesisir di Sibu.

    “Nyema menang, kitai deka mantu ngemansangka Sibu lalu mai mayuh pemansang sereta mantu nyapai status mengeri besai,” ku iya.

    Wong seraya meri terima kasih ngagai kaban Bumiputera ketegal sukung ngelama tu. #UtusanBorneo

    No comments

    Post Top Ad