Header Ads

  • Berita Tebaru

    13 kunteriktor dipilih ngemanah sekula tuai enggau repuk

    Datuk Sri Fadillah Yusof
    KUCHING: Surat setuju terima udah diserahka ngagai 13 kunteriktor ngambi bejalaika projek renggat keterubah ngaga baru enggau ngemanahka 51 buah sekula ke udah tuai sereta repuk di nengeri tu, ngena ungkus belanja  RM130.62 juta.

    Menteri Kereja Raya, Datuk Sri Fadillah Yusof madahka semua 13 kunteriktor menua tu ke dipilih nya deka bejalaika projek nya ngena chara Sistem Binaan Berindustri (IBS).

    “Ungkup projek renggat keterubah ti dipejalaika Opis Kereja Raya (JKR) Malaysia nengah JKR Sarawak tu, kitai deka ngemanah 51 buah sekula ngena ungkup belanja RM130.62 juta.

    “Lalu laluh ungkup renggat keterubah ti bisi 66 buah agi sekula ke udah tuai sereta repuk di nengeri tu deka dipejalaika Opis Menteri Pelajar Malaysia (KPM),” ku iya.

    Iya mansutka pekara nya dalam aum pengarang berita pengudah nyuaka surat setuju terima ngagai 13 kunteriktor ba Sekolah Kebangsaan (SK) Sungai Pinang, Bau ditu, kemari.

    Pengawa ngaga projek renggat keterubah tu mungkur 13 pakej enggau skop kereja ti bisi 294 bilik kelas, 12 buding, 7 bilik sains, 28 unit agu enggau 6 balai makai.

    Timpuh nembuka projek tu dipelabaka dalam kandang empat bulan pengudah nyerahka taba nya, ngena teknologi IBS magang.

    Dulu ari nya sebedau nyerahka surat setuju terima, Fadillah mega ngelalau kunteriktor bejalaika projek nitih ke udah ditimpuh sereta nitihka spesifikasyen enggau standard.

    Kunteriktor  ke enda tetitihka kriteria nya ku iya, enda diberi peluang ngambi bagi dalam projek ti sama ba renggat kedua enggau nangkanka nya.

    Projek tu ku iya, komitmen Menteri Besai Datuk Seri Najib Tun Razak nengah Bajet 2018 ke alai iya udah madahka ungkup belanja sepenyampau RM2.5 bilion ungkup 2,000 buah sekula ke udah tuai sereta repuk di serata menua.

    Ari penyampau nya ku iya, Sarawak enggau Sabah bisi penyampau sekula ke udah tuai sereta repuk ti pemadu mayuh lalu kededua buah nengeri sama bela nerima ungkup belanja sepenyampau RM1 bilion.

    Sama bisi datai ba pengerami nya kemari, Direktor JKR Sarawak Datu Ir Zuraimi Sabki, Kaban Kunsil Nengeri (ADUN) Serembu, Miro Simuh enggau ke bukai. #UtusanBorneo

    No comments

    Post Top Ad