Header Ads

  • Berita Tebaru

    656,373 hektar tanah udah digazet nengah Program Nyukat Kelingi Inisiatif Baru NCR

    Datuk Amar Awang Tengah Ali Hasan
    MIRI: Perintah nengeri udah ngazet 656,373 hektar tanah ari 421 kandang menua di Sarawak ari baruh Program Nyukat Kelingi Inisiatif Baru Tanah Adat Bumiputera (NCR) naka 30 Januari tu tadi.

    Sapit Kepala Menteri Sarawak Datuk Amar Awang Tengah Ali Hasan madah dalam timpuh ke sama sepenyampau 509 kandang menua ngaul tanah pemesai 827,813 hektar di Sarawak udah tembu disukat di baruh program ti sama.

    “Ungkup Bagi Menua Miri penyampau kandang menua udah digazet iya nya 25 kandang menua 15,584 hektar pemesai seraya kandang menua ti tembu disukat iya nya 28,548 hektar ari 33 kandang menua,” ku iya rambau pengawa nyuaka pala tanah enggau chek pampas tanah ditu, kemari.

    Jaku iya dibacha Menteri Muda Perambu Mengeri, Pengatur Tanah enggau Rampa Menua, Datuk Len Taliff Salleh.

    Awang Tengah ke mega Menteri Industri enggau Pemansang Pengawa Dagang nyamin pengempu tanah ti udah digazet anang irau bekaul enggau isu ngachau tanah laban dokumen gazet nya udah chukup nyadi tanda nyata tanah udah bisi orang ngempu.

    “Pengudah digazet, pala tanah deka dikeluar tang dikena ngulihka surat pala tanah nya, pengawa nyukat ari baruh Program Nyukat Lot Individu meseti dipejalai,” ku iya.

    Iya ngarapka pengempu tanah meri kerejasama ngambika kereja nyukat ulih dipejalai enggau jampat lalu pala tanah mega ulih diberi enggau jampat.

    Ngenang pasal pengawa nyuaka chek pampas kemari ku iya, bisi 107 iku pengempu tanah deka nerima chek pampas sepenyampau RM1,849,104.50 pengudah tanah sida dikena endur bejalaika projek pemansang perintah.

    Nitih ku iya, pampas nya dibayar ngambika perintah ulih bejalaika projek pemansang baka projek jalai alun Jalai Saeh, Niah enggau Jematan Sungai Sibuti sereta jalai ngagai Genturung Pendiau Rambai, Bekenu.

    “Tu ngayanka perintah enda ngerampas tanah baka ti didawa sekera raban lalu perintah meri pampas ti setipak seriris enggau agih ke bisi dalam Undang- Undang Tanah Nengeri,” ku iya nambah. #Bernama

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: