Alexander Nanta dipadu nyadi Sekretari Besai PBB - Berita Iban Online

Header Ads

  • Baru Nyadi

    Alexander Nanta dipadu nyadi Sekretari Besai PBB

    AUM MEDIA : Abang Johari benung meri penerang ba aum pemberita pengudah nutup gempuru Besai PBB ke-14 di Palan Konvensyen Borneo Kuching (BCCK) kemari. Bela dipeda Nanta (bediri empat kanan) enggau bala bukai.
    Nya beduduk ari Dr. Rundi udah dichiri nyadi mandal presiden Parti Pesaka Bumiputera Bersatu ke baru.

    KUCHING: Kaban Parlimen Kapit ti mega nyadi Sapit Menteri Pemansang Menua Pesisir enggau Kandang Menua, Datuk Alexander Nanta Linggi dipadu nyadi Sekretari besai Parti Pesaka Bumiputera Bersatu (PBB) ke baru nganti Dato Sri Stephen Rundi anak Utom, ba atur pengawa gempuru Besai PBB ke-14 di Palan Konvensyen Borneo Kuching (BCCK) kemari.

    Pekara nya dipansutka Kepala Menteri ti mega nyadi Presiden PBB sereta Chairman Barisan Nasional (BN) Sarawak, Datuk Patinggi Abang Johari Tun Openg ba aum media pengudah nutup atur pengawa nya kemari.

    “Datuk Alexander Nanta Linggi nyadi Sekretari Besai PBB ke baru nganti Dato Sri Stephen Rundi anak Utom,” ku iya seraya madahka pekara nya udah dipadah ba atur pengawa nutup Konvensyen PBB ditu, kemari.

    Tuduh pangku pengawa nya beduduk ari Dr. Rundi udah dichiri nyadi mandal presiden PBB ke baru, begulai enggau Datuk Roland Sagah Wee Inn sereta Dato Gerawat Gala.

    Nanta lebuh dikerandau kemari, madahka iya berasai temegah ati enggau tuduh pangku pengawa ke dipadah presiden parti sereta raban parti PBB bukai ke arapka iya mangku pengawa nya.

    “Tu pengawa ke berat ngagai parti lalu ari sukut bejalaika pengawa nya sereta ngemutarka parti.

    “Iya mega ukai pekara ke muntang tang aku deka bejalaika pengawa nya enggau naka pemanah,” ku iya.

    Ba lansa bukai, gempuru besai tu mujur digaga, alai mayuh timbal diterima ari pun menua, ku Abang Johari.

    “Aum besai ke-14 tu mujur digaga nyengkaum kami nerima mayuh timbal ari pun menua kelebih agi dalam pengawa ngaga transformesyen ekonomi ke Sarawak nengah digital.

    “Semua raban parti bisi meri penemu sereta sukung sida iya ba pengawa Perintah Menua Sarawak baruh pegai PBB, nuju pemansang ke mujur.

    “Pekara tu dikemeratka kelebih agi pemansang di emnua pesisir, alai kitai enda tau enda ngemansangka (connectivity) ari sukut penyambung siber, jalai sereta jematan ke deka dipajakka pemansang, nyengkaum masang grid ai di menua tu,” ku iya.

    Kelimpah ari nya, iya madah, maya muka gempuru PBB tu Hari Enam tu tadi ulih Menteri Besai, Datuk Seri Mohd Najib Tun Razak, iya meri kelala ngagai PBB nyerumba sebuah parti ke tegap, beserakup, ke meri peransang ngagai kaban parti, majak ngetanka adat ke udah lama dipegai ulih parti nya, ke betatika penyerakup.

    “PBB nyerakupka semua parti, sereta betatika pemerat rayat, enda ngira bansa sereta pengarap tauka ni sitak menua kita,” ku iya.

    Entara pemerat ke bisi dipejuraika maya gempuru besai PBB tu tadi, Abang Johari ti mega nyadi presiden PBB sereta chairman Barisan Nasional (BN) Sarawak madahka Menteri Besai udah besetuju deka numbuhka renggat ke pengabis tinggi di Perintah Besai bejuraika MA1963.

    “Di Sarawak, MA1963 deka dipejurai ulih Sapit kepala Menteri, Datuk Amar Douglas Uggah anak Embas, Tan Sri Datuk Amar James Jemut Masing enggau Datuk Amar Awang Tengah Ali Hasan ke nyadi raban renggat menua bejuraika pekara tu ila,” ku iya, ke madahka komiti tu udah ditumbuhka dalam bulan Oktober 2017.

    Ba lansa bukai bekait enggau pemesai kaban PBB ke enda dipilih mangku pengawa besai, sida iya deka diambi ngagai MKT parti nya.

    “Sida ke enda kena pilih, deka diambi ngagai MKT kami, lalu mayuh ari sida tu rebak baru,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads