Ampuh bah: Sarawak deka diperati dalam timpuh dua bulan - Berita Iban Online

Header Ads

  • Baru Nyadi

    Ampuh bah: Sarawak deka diperati dalam timpuh dua bulan

    KEMERAH: Shahidan ngelimpangka diri ngerandau nembiak mit di PPS SK Mang.
    KOTA SAMARAHAN: Sarawak diatu diberi perati khas dalam timpuh dua bulan tu dikena napi sebarang pekara ke tau nyadi maya musim ampuh bah tu.

    Menteri di Opis Menteri Besai, Datuk Seri Shahidan Kassim madah, ba pekara tu, Ejensi Ngintu Penusah Ngenyit Menua (NADMA) deka nganjung mayuh agi bantu raban enggau logistik nitihka peminta nengeri dikena mutarka penusah ampuh bah di Sarawak.

    Pia mega ku iya, pemerat diatu diberi ngagai ampuh bah di Sarawak laban dipelaba penusah tu diatu majak nyadi nyentuk bulan Mac ila.

    “Semua logistik ditu chukup nyengkaum lori, bot enggau langkau ke ulih dipindah kin kitu ke betutupdeka dianjung abis laun minggu baru.

    “Pekara ke pemadu beguna semua 17 palan ngenduh diintu memanah, aku tau meri lima bintang,” ku iya.

    Iya mansutka jaku nya ba aum pengarang berita pengudah ngabas begulai enggau Sapit Kepala Menteri Datuk Amar Douglas Uggah Embas ba Palan Ngenduh Sekula Primari (SK) Genturung Pendiau Mang ditu, malam kemari.

    Sama bisi datai Sapit Ketuai Direktor (Pengudah Penusah Ngenyit) NADMA, Datuk Mohd Yusuf Wazir enggau Kaban Parlimen Samarahan, Rubiah Wang.

    Shahidan mega bisi ngemendarka 4,000 angkau ke ulih dipindah kin kitu tekala nya dikena sida ti tasah ampuh bah di nengeri tu.

    Berebak enggau nya, iya bisi ngelimpangka diri urung sejam pengelama berandau enggau 108 iku ti tasah ari 24 ruang bilik ti dipindah ngenduh ba palan nya.

    Nampung baru ku iya, palan ngenduh diatu ukai semina diintu Opis Pemansang Mensia Mayuh (JKM) begulai enggau gerempung ukai dikuasa perintah (NGO) aja tang mega disaup ejensi perintah baka Raban Nyaga Pengelikun Mensia Mayuh Malaysia (APM), Opis Bomba enggau Penyah Penusah (JBPM) sereta raban bukai.

    “Enti sema perintah nengeri begunaka sebarang guna, kitai deka berunding jampat ungkup pengelantang rayat, kelimpah kereban nembiak enggau sekula ti rusak mega deka diberi agihka belanja enggau jampat.

    “Aku mega temegah meda gaya ditu, ke alai Douglas ti mega nyadi Chairman Opis Mutarka Penusah Ngenyit Nengeri (JPBN) begulai enggau Opis Pelilih, MP empu bisi datai nentuka pengelanchar enggau semua perengka guna chukup,” ku iya.

    Kelimpah ari nya, pengari Sekretariat Komiti Mutarka Penusah Ngenyit Nengeri Sarawak (JPBNS), ngeripotka 2,613 iku peranak ari 697 ruang bilik udah dipindah ngagai 18 PPS naka pukul 10.30 malam kemari. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads