Bai kes ngagai sepital perintah nyema bisi nerima kes diketup ukui - Berita Iban Online

Header Ads

  • Baru Nyadi

    Bai kes ngagai sepital perintah nyema bisi nerima kes diketup ukui

    Sapit Kepala Menteri Datuk Amar Douglas Uggah Embas
    KUCHING: Sapit Kepala Menteri Datuk Amar Douglas Uggah Embas ngelalau klinik peribit di serata nengeri tu ngambika enggau lengkas mai kes ngagai sepital perintah, nyema bisi nerima kes diketup ukui.

    Iya madahka sepital perintah bisi prosedur tauka Standard Operation Procedure (SOP) ke dititihka, bekaul enggau ngubat orang ti kena rabies.

    “Sekali agi aku deka ngelalau klinik peribit di serata Sarawak, enti kita bisi nerima orang berubat ketegal kena ketup ukui, enggau bebendar aku madahka kita patut enggau lengkas mai kes nya ngagai sepital perintah.

    “Laban ba sepital perintah, kitai bisi SOP bekaul enggau chara ngubat orang ti kena rabies.

    “Kitai ba sepital perintah mega bisi dua bansa vaksin dikena ngelaban rabies iya nya sebansa ungkup ukui lalu sebansa agi ungkup mensia.” ku iya ti mega nyadi Chairman Komiti Mutarka Penusah Ngenyit Sarawak.

    Uggah dikerandau lebuh ke bisi datai ngagai program meri vaksin ngagai jelu ke diatur Opis Veterinar Sarawak begulai enggau beberapa gerempung, ti diatur ba MJC, Batu Kawa ditu, kemari.

    Sama bisi datai ba program nya Menteri Kaunsil Kandang Menua enggau pengawa Berumah Datuk Dr. Sim Kui Hian sereta pemangku direktor Opis Servis Veterinar Sarawak Dr. Adrian Susin Ambud.

    Iya madahka diri udah berandau enggau Dr. Sim bekaul enggau pekara nya lalu deka terus mai kes ngagai opis pengerai, ngambika semua kes ke diripot nya ulih ditemu opis nya.

    Kelimpah ari nya, Uggah arap bendar penyakit rabies tauka ukui gila di nengeri tu ulih diputarka enti mensia mayuh terus meri sukung ngagai pengawa muntan sereta nagang kes tu.

    “Aku arap bendar nengah kerejasama ari semua piak, penyakit rabies tu ulih nadai agi nyadi di Sarawak.

    “Nya alai kitai deka terus nempa kerejasama enggau mensia mayuh senentang pelajar tauka penyedar pasal vaksin enggau kelebih agi ngambika raban biak nemu pasal penusah ke nyadi ketegal rabies,” ku iya seraya madahka juluk nengeri deka nadai agi rabies dalam timpuh dua tauka tiga taun ke deka datai, lalu Sarawak ulih diaku nadai rabies Organisasyen Pengerai Dunya (WHO). #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads