Header Ads

  • Berita Tebaru

    Bas elekterik deka dikena ngangkat pemanah sistem bas di mengeri Kuching

    Kepala Menteri Datuk Patinggi Abang Johari Tun Openg
    KUCHING: Perintah nengeri ngaga pemutus deka ngangkatka pemanah sistem bas di mengeri besai Kuching tu iya nya ngena bas elekterik, dalam timpuh tiga taun ke deka datai.

    Kepala Menteri Datuk Patinggi Abang Johari Tun Openg madahka, bas mensia mayuh nya ke ngena sistem elekterik nya patut beresi laban nya ulih nyadi pematak industri dagang temuai.

    Iya madahka perintah nengeri sedia nerima bantu Suruhanjaya Pengangkutan Awam Darat (SPAD) ke deka mantu kompeni bas di nengeri tu ngangkatka pemanah sistem bas iya nya nyendiaka bas baru tang agi ngena diesel.

    “Perintah Sarawak sehari tu udah ngaga pemutus iya nya semua bas ditu enda tau enda bas elektrik, bas ke ngena kuasa elektrik.

    “SPAD endang bisi deka mantu konsortium kompeni kitai, lalu kitai amat beterima kasih tang anang mih ngena bas diesel laban kemaya hari tu orang ngena bas elektrik.

    “Kami (perintah nengeri) bisi meri penemu ngagai sida (SPAD) ngambika ngurangka pemayuh bas awakka bisi dikena meli bas elekterik, lalu perintah nengeri pan besedia deka mantu ari segi ungkup belanja, ti dipelabaka urung RM50 juta.

    “Kitai bisi kuasa elekterik sereta murah laban kitai bisi hidro sereta kitai ulih ngisi kuasa elekterik (ngagai bas). Tang ke pemadu beguna bas mensia mayuh tu enda tau enda beresi. Kitai deka ngatur tu dalam timpuh tiga taun tu,” ku iya.

    Abang Johari mansutka pekara nya dalam aum pengarang berita pengerami bejadika premis baru Inter-Continental Travel Centre Sdn Bhd (ITC) ke diatur ba premis nya ditu, kemari.

    Bejaku baru iya madah sistem bas elekterik sereta ngemeratka pemeresi ulih mantu industri dagang temuai di Kuching tu laban temuai kelebih agi ari menua tasik rinduka rampa menua ti beresi.

    “Perengka penangkut ti ‘friendly’ deka nyadi insentif ngagai mensia ke nemuai ke Kuching laban nya chukup kondusif ngagai bala temuai.

    “Nya alai perintah nengeri deka ke semua perengka penangkut mensia mayuh kitai enda tau enda ke ngena kuasa elektrik lalu nya servis baru ke manah ngagai temuai ke datai ke Sarawak,” ku iya.

    Kelimpah ari nya, lebuh ke ngenang pasal  bas hidrogen ke deka dipejalaika di nengeri tu, Abang Johari madahka tiga buah bas nya deka datai suku ketiga taun tu.

    Sebedau tu Abang Johari lebuh ti nemuai ke Melaka dalam bulan Disember 2017, kala madahka Kuching deka nyadi mengeri besai keterubah di menua tu ke ngembuan bas ngena kuasa hidrogen lebuh tiga buah perengka pengangkut nya datai ari menua China  manggai ba bulan Julai taun 2018, ke nyadi sebagi ari program pemansang enggau pansik Sarawak Energy Berhad.

    Sama bisi nyempulang Abang Johari dalam aum pengarang berita nya kemari, Menteri Dagang Temuai, Seni, Main Asal, Nembiak sereta Lumba enggau Main Datuk Abdul Karim Rahman Hamzah, Direktor Urusan ITC, Dyg Azizah Abg Zaidan enggau ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: