Header Ads

  • Berita Tebaru

    Beri sukung ngagai iring sereta polisi KM, ku Empiang

    NGELALAU: Empiang ngelalau raban Pampang Indu PBB ngambika terus nyukung iring presiden parti. #FriendsKLXpressSarawak
    KUCHING: Pampang Indu Parti Pesaka Bumiputera Bersatu (PBB) diperansang terus bejalaika tanggungpengawa enggau proaktif meri sukung ngagai iring sereta polisi ke dipejalaika Kepala Menteri Datuk Patinggi Abang Johari ti mega Presiden PBB.

    Tan Sri Dato Sri Empiang Jabu, dalam jaku pengelalu seraya ngelalau ba hari ke penudi mangku penuduk Ketuai Pampang Indu PBB madah Abang Johari siku orang ti ngembuan juluk besai deka ngemansangka nengeri ngena chara sereta polisi baru.

    Entara inisiatif polisi ke ditumbuhka baka DBOS, PETROS, Extensive High Speed Broadband Digital Programme, ngemansangka kandang RECODA/SCORE, Hydrogen Fuel Inititiave, LRT kelimpah ari deka mutarka isu Pemakai Menua enggau Pulau Galau sereta deka ngambi pulai baru hak Sarawak dalam MA63.

    “Aku enggau baruh ati ngelalau semua kaban PBB  nyengkaum Pampang Indu ngambika terus tegap ngemeranka prinsip taluk, dedikasi, sama bebasaka pangan diri, nyadi siti tim, beserakup sereta nadai bebagi sukung ngagai YAB Datuk Patinggi Abang Johari sereta nyukung polisi perintah Barisan Nasional.

    “Aku arap bendar Pampang Indu parti ulih sama bejalaika tanggungpengawa nyapai juluk politik ti tegap, bisi pemaik sereta pengelantang dalam pupu bansa ke ulih mai pemansang enggau pengelantang ke ulih diasaika semua kelebih ari peranak di menua pesisir,” ku iya.

    Empiang mansutka pekara nya dalam jaku pengelalu pengerami bejadika Gem[puru Besai Pampang Indu enggau Nembiak Parti Pesaka Bumiputera Bersatu Ke-14, ti diatur ba BCCK ditu, kemari.

    Aum nya udah mujur dipenyadi Abang Johari sereta diguluKaban Kaunsil Besai Parti PBB, pengari ari parti komponen BN, raban Nembiak enggau Indu  sereta ke bukai.

    Kelimpah ari Pampang Indu mega patut lebih beratka pekara pelajar dikena ngenukuka anak bebelajar bebendar sereta tejapaika pelajar tinggi ti bekualiti awakka ulih sama besaup bejalaika pemansang di nengeri tu.

    “Raban Indu PBB enda tau enda ngambi bagi dalam transformasi pemansang nyengkaum dalam projek ekonomi. Nengah pelajar ti nyulut kitai ulih sama sebela enda ngira penempa,” ku iya.

    Kemari hari ke penudi Empiang mangku penuduk Ketuai Pampang Indu, sereta sah diganti Dato Sri Fatimah Abdullah pengudah Kaunsil Besai Pampang Indu direrak.

    Empiang ti udah 23 taun nyadi Sapit Ketuai Indu PBB sereta nyadi Ketuai Pampang Indu PBB pengelama 10 taun beterima kasih ngagai sukung parti ke diberi ngagai iya.

    “Aku meri pengaga ati ngagai YB Dato Sri Fatimah Abdullah laban dipilih nyadi Ketuai Pampang Indu PBB.

    “Aku arap bendar YB Dato Sri Fatimah Abdullah ke nyadi penganti aku ulih seati sejalai majak begulai enggau Indu Besai PBB enggau Pampang Nembiak PBB, beserakup bepelasarka polisi ti dirintai Kaunsil Besai Parti,” ku iya.

    Rintai Kaban Kaunsil Besai Pampang Indu PBB Sesi 2017-2020 iya nya Fatimah nyadi ketuai, lalu dua iku sapit ketuai Dato Sri Rohani Abdul Karim (Bumiputera) enggau Datin Angelina Celestine Ujang (Pesaka) sereta tiga Naib Ketua iya nya Dato Sri Nancy Shukri (Bumiputera), Dato Catherine Gramong (Pesaka) enggau Dato Dayang Madinah (Bumiputera). #UtusanBorneo

    No comments

    Post Top Ad