Chuan PRN Sarawak deka dititih maya Pengawa Bepilih Besai Ke-14 PRU14 - Berita Iban Online

Header Ads

  • Baru Nyadi

    Chuan PRN Sarawak deka dititih maya Pengawa Bepilih Besai Ke-14 PRU14

    Datuk Seri Ahmad Zahid Hamidi
    PUTRAJAYA: Sarawak ngembuan chuan ke silik ungkup pengawa bepilih, ku Sapit Menteri Besai Malaysia, Datuk Seri Ahmad Zahid Hamidi.

    “Ke Pengawa Bepilih Besai (Parlimen) ke sekali tu, kami deka nitih sebagi ari chuan pemenang Sarawak tu, dikena di dalam struktur operasi pengawa bepilih Barisan Nasional (BN) di serata menua Malaysia.

    “Tu chuan ke udah ditetap…Dalam pekara tu, aku mantu YAB Menteri Besai ngambika chuan tu dititih nyadi sebagi ari strategi pengawa bepilih.

    “Aku meri terima kasih ngagai pengarang berita ari Sarawak, iya nya pengawa ke digaga sida iya, ngaga sereta ngambi berita sebedau kimpin pengawa bepilih besai menua Sarawak nyadi chunto ke pengarang berita kitai di Sabah enggau di Semenanjung Malaysia, ukai semina bungkur berita tang chara ngaga berita sereta kereja ke udah dipandangka pemayuh pengarang berita di Sarawak chunto ke manah,” ku Ahmad Zahid.

    Iya madah munyi nya lebuh bejaku ngelaluka pengarang berita ari Kuching sereta Gerempung Pengarang Berita Pelilih Menua Kuching (KDJA) betuaika chairman gerempung nya, Jacqueline David ke ngulu raban pengarang berita ari Kuching ngelawa Opis Sapit Menteri Besai nya di Perdana Putra, Putrajaya, bedau lama tu tadi.

    Iya madahka nyerumba pemenang BN di Sarawak chunto kimpin pengawa bepilih ke pengabis manah, maya Pengawa Bepilih Besai Menua ke-11 (PRN ke-11) dalam bulan April 2016.

    “Chuan pemenang BN di Sarawak, sebagi ari chuan nya deka dikena maya PRU ke-14 tu ila.

    “Sigi dipeda…Aku empu meda bakani ku chunto kimpin pengawa bepilih Sarawak digaga enggau silik sereta atur beratika BN menang besai,” ku iya.

    Ahmad Zahid ti mega nyadi Sapit Chairman Barisan Nasional madah, beratika maya pejalai iya di Sarawak maya PRN ke-11, iya madah chara kimpin pengawa bepilih BN Sarawak digaga enggau sistematik nengah tiap iku chalun BN Sarawak.

    Iya mega madahka, asil ari pemenang BN Sarawak (lebuh nya) baruh pegai ex-Kepala Menteri, niang Pehin Sri Adenan Satem, 72 penuduk Kunsil Nengeri (DUN) ari 82 penuduk ke alai bediri, beratika chunto tauka chuan nya chukup ngasi.

    “Pakar strategik politik Sarawak madahka, entara elemen kimpin BN Sarawak iya nya timbal pengundi di penuduk DUN , alai pekara bekaul enggau penyadi ba sitak bisi ditemu lalu diputar tekala nya.

    “Timbal sereta ngemutarka penanggul tekala nya tauka enggau jampat entara pengasi kena ngagaka rayat ngasaika sida iya dikemerat, semak enggau pemesai lalu ngasaika empas ke manah sereta berasai lantang ba parti ke megai menua.

    “Maya Opis Pengawa Bepilih (SPR) madahka pemutus PRN ke-11, ‘Sarawak BN menang lantang’,” ku iya.

    Ahmad Zahid ti mega nyadi Menteri Dalam Menua (KDN, maya nyamu pengarang berita ari Kuching enggau Putrajaya ba tur pengawa ‘High tea’ nya bisi bekunsika peneleba pemujur PRN ke-11 Sarawak laban penyakal seruran ngemaruhka pengawa ke digaga BN sereta perintah.

    “Aku deka madah, iya nya kami (BN) nyengkaum parti komponen benung, enggau naka ulih belajar ari pemujur Sarawak.

    “Aku deka mantu Menteri Besai Datuk Seri Najib Tun Razak, ngambika chunto nya dikena nyadi sebagi ari strategi maya PRU ke-14 tu ila.

    “Rayat Sarawak mujur malas penuai politik nya nengah undi sereta nyadi rayat ke mereti,” ku iya.

    Dalam pekara tu ku iya, chara ‘Retain and Regain’ enda tau enda digaga nyadi isi chuan ke nyelai kimpin BN ke PRU tu ila.

    “Tanka majoriti ke besai sereta ambi baru penuduk ke udah lenyau sebedau tu,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads