Header Ads

  • Berita Tebaru

    Dua ari 11 palan ngenduh ampuh bah di Serian udah ditutup pagi kemari

    Dato Sri Richard Riot Jaem
    SERIAN: Taja langit mambam enggau ujan beberis enda ngengetu, ai bah majak surut nitih ku ripot di menua ari raban bejalaika pengawa mantu enggau nyelamat ditu.

    Ba pengawa meri penerang ngagai Menteri Pengatur Pengereja Pengawa, Dato Sri Richard Riot Jaem ba pemadah ke pemadu baru ampuh bah di Bagi Menua Serian, Pemesai Pelilih Serian, Lim Hock Meng madahka dua ari 11 palan ngenduh tasah ampuh bah di serata bagi menua nya udah ditutup pagi kemari (Hari Tiga).

    “Nyema gaya hari agi panjai, siti agi palan genduh deka ditutup sehari tu laban sida ti tasah ampuh bah deka mulaika diri ngagai rumah diri empu,” ku Lim madah ngagai MP Serian enam penggal, ti terebai pulai ke Serian ari Kuala Lumpur, penerebai pemadu tumu kemari, laban deka meda gaya penusah bah.

    Pengawa meri penerang nya bela digulu bala ketuai opis perintah nyengkaum Sapit Residen Mastapa Julaihi, Pemesai Pelilih Tebedu Raymond Achen, Sekretari Kaunsil Pelilih Serian Constantine Jonas Noeb, Ketuai Polis Serian DSP Aswandy Hanis, Ketuai Opis Pengintu Pengelantang Serian Evelyn Musa enggau bala pengari ari Bomba, JPAM sereta soldadu.

    Ku Lim, bisi 363 ruang bilik ti mungkur 1,260 iku udah ngenduh ba 11 bengkah palan nya.

    Ku iya, tujuh genturung pendiau enggau 389 ruang bilik ke mungkur 1,692 iku mega kena  penusah ampuh bah tang enda dipindah ngagai palan ngenduh.

    “Semua bisi 21 genturung pendiau, 793 rumah enggau 3, 034 iku peranak tasah ketegal ampuh bah kenyau ari kemari (Hari Dua),” ku Lim nambah.

    Nitih ku Lim, baka selama, penanggul ditapi raban gawa mantu enggau nyelamat iya nya sida ti tasah enggau pindah ngagai palan ngenduh, betapi pemar ngagai kandang menua ketegal jalai alit laban tanah.

    Pia mega ku iya, tebal agi sida ti tasah besebanaka utai tanam sida ti rusak enggau jelu tupi.

    Riot, meri puji ba pemanah pengawa mantu enggau nyelamat dipejalaika semua sida ke bekaul, ngelalau sida berat sereta naka ulih nyeliahka penusah bebadi nyawa sereta ngurang tating penusah sida ti tasah ampuh bah.

    Kaban Parlimen Serian ngelalau sida ti gawa mantu patut nyaga pengelikun diri empu sereta pengelantang sida mega.

    Riot, in praising the excellent coordination of rescue and relief efforts of all those involved, reminded them that their focus must be to prevent loss of life and to ease the sufferings of those displaced by the floods.

    Meretika penusah bah nyadi penanggul ditapi ninting taun di Serian, Riot besemaya deka ngagihka belanja RM50,000 nyadi pemungkal ungkup komiti mantu enggau mutar penusah ngenyit bagi menua dalam taun baru.

    “Ke diatu, aku deka nyuaka bantu mata duit dikena melanja ungkus minyak ngagai sida ti gawa di renggat baruh baka raban Rela enggau kaban Komiti Pemansang Enggau Pengelikun Genturung Pendiau (JKKK),” ku Riot.

    Pengudah pengawa nya tembu, Riot bisi ngawakka diri ngabas sekeda palan ngenduh, nyengkaum Balai Komuniti Serian ti nyadi palan ngenduh 423 iku datai ari 133 ruang bilik. #UtusanBorneo

    No comments

    Post Top Ad