Header Ads

  • Berita Tebaru

    Fadillah beterima kasih laban agi dikearap ngesan pengawa besai

    Menteri Kerja Raya Dato Sri Fadillah Yusof
    KUCHING: Menteri Kerja Raya Dato Sri Fadillah Yusof ti menang nadai belaban penuduk Mandal Kanan Parti Pesaka Bumiputera Bersatu (PBB) ungkup Bumiputera, nya pengarap besai ke dipegai sereta meri terima kasih laban terus meri peluang dalam parti besai Barisan Nasional (BN) Sarawak.

    Fadillah beterima kasih ngagai semua delegit 82 pampang PBB ti arap sereta meri mandat ngagai iya mangku penuduk Mandal Presiden PBB Sesi 2017-2020.

    “Orang ti nganjung nama selubang penemu ti ngasuh aku menang nadai belaban ba penuduk tu endang siti pengarap besai ka patut aku san lalu aku beterima kasih laban agi terus diberi peluang gawa ke parti besai BN Sarawak tu.

    “Aku besemaya deka memikul amanah enggau tanggungpengawa tu enggau naka pemanah ke ulih sereta meri servis ti pemadu manah ngagai parti enggau lebih agi ngagai rayat Sarawak.

    “Aku mega besemaya deka bediri tegap begulai enggau ketuai ngiring parti dikena nentuka pemujur nyapai jukuk PBB ke pemaik rayat enggau nengeri tu,” ku iya nengah siti penerang, ensana.

    Fadillah menang nadai belaban ungkup penuduk nya maya pengawa milih chalun Majlis Tertinggi Parti PBB ke diatur ba Indu Opis PBB, ensanus.

    Sebedau tu Fadillah kala nyadi Ketuai Raban Nembiak PBB. Lalu ungkup sesi 2017-2020 ketuai raban nembiak iya nya Gerald Rentap Jabu ti mega menang nadai belaban.

    Nambahka nya lebuh ke ngenang tebal agi penuduk ke pemadu tinghgi dalam parti nya ti menang nadai belaban ba pengawa bepilih dalam PBB ke sekali tu, iya madahka nya ngayanka penegap penyerakup dalam parti sereta sukung tegap ngagai Kepala Menteri.

    “Meri puji ngagai YAB Kepala Menteri Datuk Patinggi Abang Johari Tun Openg ti menang nadai belaban ungkup penuduk Presiden Parti PBB sereta dua iku Sapit Kepala Menteri Datuk Amar Douglas Uggah Embas enggau Datuk Amar Awang Tengah Ali Hasan ti menang nadai belaban ungkup penuduk Sapit Presiden PBB Sesi 2017-2020.

    “Tu mega pemenang kaban parti ti deka meda PBB terus tegap di baruh iring YAB Kepala Menteri Sarawak dalam Pengawa Bepilih Besai Ke-14 (PRU14) ke deka diatur sebarang maya aja dalam taun tu, kelimpah ari deka meda mayuh agi pemansang di Bumi Kenyalang sereta nuju pengawa ngenegapka pemansang ekonomi digital.

    “Lalu penuduk Naib Presiden (kuota Bumiputera) ti deka dipelabanka, aku arap sereta pechaya nya deka diatur nundaka runding diri sebilik enggau prinsip beserakup dalam PBB,” ku iya.

    Iya mega meri puji pengaga ati ngagai Kaban Kaunsil Tinggi Baru PBB sereta raban baru Raban Nembiak PBB enggau Raban Indu PBB ti sama menang nadai belaban. #UtusanBorneo

    No comments

    Post Top Ad