Fatimah deka diangkat nyadi Ketuai Indu PBB - Berita Iban Online

Header Ads

  • Baru Nyadi

    Fatimah deka diangkat nyadi Ketuai Indu PBB

    Dato Sri Fatimah Abdullah
    KUCHING: Nengah pemereti enggau berekat Presiden Parti Pesaka Bumiputera Bersatu (PBB), Dato Sri Fatimah Abdullah ke nyadi Sapit Ketuai Raban Indu diatu deka mangku penuduk Ketuai Raban Indu ke dilengka Tan Sri Empiang Jabu.

    Nitih ku Empiang ti nerangka pekara nya madah, pemutus nya bepelasarka lalau presiden parti Datuk Patinggi Abang Johari Tun Openg sereta ketuai renggat atas ti ngelalau ngambika penuduk ketuai raban indu enggau ketuai raban nembiak enda ibuh diperebutka.

    “Enti nitihka runding ngena enggau sukung ari semua pampang ke udah mutuska penuduk Ketuai Raban Indu enda patut diperebutka. Nya alai nitihka runding ngena, Dato Sri Fatimah Abdullah deka nyadi Ketuai Raban Indu udah tu,” ku Empiang madah ngagai pengarang berita pengudah aum khas ungkup konvensyen PBB, ke diatur ba Indu Opis PBB ditu, ensanus.

    Nambahka nya bepelasarka penemu Kaunsil Besai Raban Indu,madahka ketuai renggat tinggi raban orang indu ke sekali tu dipangku kaban ari pampang Bumiputera.

    “Kes tu mega nyadi ba Raban Nembiak iya nya Bumiputera deka meri awak ngagai Pesaka. Atur tu udah nyadi polisi dalam parti. Nya alai nadai diperebutka pangku pengawa ketuai pemadu tinggi lalu aku ngasaika tetiap pampang deka nyukung pemutus tu maya dichalunka.

    “Aku gaga ati ngagai ketuai baru dalam Raban Orang Indu ke agi biak sereta siku orang ti patut lalu raban Kaunsil Besai kitai nyengkaum beberapa orang lama ke mayuh peneleba enggau mungkur semua pekara dalam kereja sida sereta suag semak enggau nembiak redak.

    “Dalam Kaunsil Besai raban indu kitai bisi penyerakup ke chukup manah. Ari sepiak Pesaka kitai bisi Iban, Bidayuh enggau Orang Ulu lalu aku ngasaika ba sepiak Bumiputera pan sama,” ku Empiang.

    Empiang, 74, bini Sapit Presiden PBB ke sebedau tu Datuk Patinggi Tan Sri Alfred Jabu Numpang, madahka diri nyurutka diri nyadi ketuai raban indu, ukai ari parti.

    “Aku nyurut diri ari nyadi Ketuai Raban Indu. Aku ukai nyurut diri ari parti. Aku deka nguji enggau naka pengulih meri bantu enda ngira chara enti servis aku nyadi Kaban Orang Indu agi diguna, ke nempa setengah ari kaban parti,” ku iya ke mangku pengawa nyadi ketuai raban indu kenyau ari taun 2007. Sebedau nya kala nyadi sapit ketuai raban orang indu berengkah ari taun 1984.

    Kelimpah ari nya, pemangku sapit presiden PBB Datuk Amar Douglas Uggah Embas ke nyadi chairman aum khas ungkup konvensyen madahka semua udah sedia ke alai presiden parti Abang Johari deka bejadika konvensyen Raban Orang Indu enggau Raban Nembiak, lalu Menteri Besai Datuk Seri najib Tun Razak deka bejadika Konvensyen PBB kena 10 Februari. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads