Header Ads

  • Berita Tebaru

    Forum Adat Iban deka diatur kena 3 March 2018

    Poster Forum Adat Iban
    KUCHING: Forum Adat Iban diatur nengah kerejasama antara raban Serakup Dayak Sarawak (PEDAS) Pampang Kuching enggau Raban Pemikir Dayak tauka Dayak Think-Tank Group (DTTG) Pampang Kuching, kena 3 March 2018 tu.

    Nitih ku penerang ari kaban komiti pengatur kemari, batang tuju atur forum tu deka meri penerang silik agi pasal Adat Iban kelimpah nampung penemu pasal Adat lama sereta main asal ti bekaul ngagai rebak baru.

    Forum tu mega nyadi pelasar nerang, nyerungkai, bejurai, enggau berandauka Adat Iban enggau Main Asal nyengkaum Adat Tikah, Adat Pemati, Adat Tanah enggau ke bukai lalu main asal mungkur pengawa benyawa baka sampi, tusut, biau, jaku ansah enggau ke bukai.

    Berambaika genteran jaku ‘Bejalai Betungkatka Adat, Tindu Bepanggalka Pengingat’, forum tu nadai natak penyampau tubuh ti deka datai lalu deka diatur sehari nyentuk bepalan di Hotel Pen View, Kuching, berengkah ari pukul 8 pagi nyentuk pukul 5 lemai.

    Bisi empat iku pengelicha ti ngembuan mayuh peneleba, pelajar sereta penemu ba pekara Adat Iban dikangau datai meri licha sereta bejuraika penemu. Sida empat tu iya nya Thomas Tegung Laka, Jantan Umbat, Nicholas Bawin Anggat enggau Dato Seri Daniel Tajem.

    Nya alai, kaban komiti pengatur nesau mensia mayuh bela sampal datai ngulu forum tu ti meri peluang ngagai kitai kelebih agi rebak baru ngiri penemu seraya nemu silik agi pasal Adat Iban.

    Penerang silik tau betanya ngagai Ketuai Komiti Pemadah, Polycarp Danson ba lumur 010-960 1120, Lina Kunjak (012-8543506) enggau Patricia Tarang (019-8487525). Nuan mega tau ngelawa Facebook Pages: FORUM ADAT IBAN 2018 #UtusanBorneo

    Jaku Gerah: Bayar nyereta forum RM50 siku lalu tau dibayar nengah akaun bank tauka rejista nengah WhatsApp web: www.wasap.my/60198487525/RejisterForumAdat.

    No comments

    Post Top Ad