Hari Nyambut Penatai Mensia Mayuh KLGS nerima sambut manah ari peranak mengeri Kuching - Berita Iban Online

Header Ads

  • Baru Nyadi

    Hari Nyambut Penatai Mensia Mayuh KLGS nerima sambut manah ari peranak mengeri Kuching

    Komander Mahamad Nazir Darus
    KUCHING: Hari Tebuka Kapal Latihan Gagah Samudera (KLGS) Tentera Laut Diraja Malaysia (TLDM) ukai semina nerima penatai mensia mayuh tang nyengkaum meri peluang ngagai kru kapal ngelala sereta nemu daya idup di mengeri tu.

    Pegawai Memerintah KLGS, Komander Mahamad Nazir Darus madahka tuju ngatur nerima penatai mensia mayuh nya ngambika ulih bekunsi peneleba enggau pengidup dalam kapal nya ngagai mensia mayuh.

    “Tuju kami ke ngatur Hari Nerima Penatai Mensia Mayuh tu, keterubah laban deka ngelakuka pasal soldadu tasik ngagai mensia mayuh sereta dikena meri penelaba ngambika nemu nama utai ke dikereja sereta pengidup kami dalam kapal.

    “Nengah chara tu kami ngarapka mensia mayuh nemu beterima kasih ngagai kami ke gawa ba tasik ke nadai orang meda pengawa kami, bisi sekeda orang engka bepenemu madahka kami semina duduk dalam kapal tang ke bendar kami nyaga kandang tasik menua ngambika rayat ulih tinduk jenak.

    “Tuju kedua, peluang kami ngenyemak diri sereta berandau enggau mensia mayuh ditu kelimpah ari datai ke Kuching tu siti ari pekara baru ngagai krew kami laban ukai semua ti asal ari Sarawak. Kami bejalai ngagai mengeri Kuching lalu nerangka daya idup Sarawak ngagai kru kapal,” ku iya.

    Nazir dikerandau raban pengarang berita nyerumba Hari Nerima Penatai Mensia Mayuh KLGS, seraya iya madahka berengkah pukul 9 pagi kemari kapal nya udah ditiki urung 1,000 iku orang ke diau di mengeri Kuching.

    “Kuching tu palan kedua ke penudi endur kami sangkai sebedau masuk ngagai Bintulu Hari Enam tu, lalu di Bintulu mega kami ngatur Hari Nerima Penatai Mensia Mayuh din.

    “Lalu sambut ari mensia mayuh di Kuching amat ngemegah sereta meransang kami,” ku iya.

    Nitih ku iya, KLGS iya nya aset baru TLDM ti berengkah beoperasi 1 Mac 2017, udah datai ba mayuh palan penyakai kapal di Malaysia enggau menua tasik.

    Ku iya sebedau datai ke Kuching, kapal nya udah sangkai ba Kota Kinabalu, Sandakan sereta kelimpah ari beoperasi ba kandang tasik Laut Sulu lalu sangkai ba Pulau Sipadan enggau Palan Penyangkai TLDM ba endur nya.

    “Kapal tu (KLGS) tu ke bendar endur kami ngelatih. Kami belayar mai pelatih lalu belatih enggau kapal TLDM ke bukai.

    “Naka ke diatu kami ngelatih urung 400 ngagai 500 iku pemesai enggau raban ke bepangkat bukai TLDM ke dibai kami belayar ngagai mayuh endur.

    “Pelatih diau dalam kapal tu seraya kapal tu ke matau (pengelikun kandang tasik). Seraya kami ke belatih, kami mega matau,” ku iya madahka kapal nya mega kapal perang.

    Lebuh ke ngenang pasal KLGS ku Nazir, kapal nya platform latih pemadu baru di dalam armada TLDM sereta kapal keterubah digaga dikena napi peminta guna latih di tasik ungkup TLDM.

    Kapal latih nya beoperasi enggau 45 iku krew ti nyengkaum lapan pegawai enggau 37 anggota sereta ulih ngundan 60 pelatih enggau 10 jurulatih ba siti timpuh.

    Pemanah kapal nya, disikap ngena sistem kombat, radar, kereban navigasyen enggai penyambung sereta senyata awak semak ti moden ke lalu ukai semina platform latih tang ulih bejalaika pengawa operasyen maya bisi peminta. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads