Header Ads

  • Berita Tebaru

    Iban ke nguan rumah panjai agi rat ngemeran adat lama

    PENDAI: Sida ke tuai, dipadu megai pengawa dulu agi mensiang pendai, endur ngatur pengawa.
    KUCHING: Raban bansa Iban ke nguan rumah panjai lebih agi adap menua Betong agi rat ngemeranka adat lama baka pengawa ngintu anak mit, kelimpah ari adat lama ke bukai.

    Adat tu mega kekadang bisi bida laban nitihka chara bala ketuai megai atur pengawa tu sereta nitihka atur di menua diri empu.

    Apin lama ke udah nyerumba pengawa ngintu taun baru 2018, Jenalius Unchie enggau Barry, peranak Rumah Chambers Maling, Menyalin Asal di Betong, bisi ngatur pengawa meri anak iya mandi di sungai lalu pengawa tu endang dikereja nitihka rurun pengawa asal kitai.

    Penama anak mit ti diintu ba pengawa tu iya nya Barbara Anak Barry enggau Amanda Anak Jenalius Unchie.

    “Pengawa meri anak mit mandi tu endang suah dikereja ba menua kami, kebuah meri anak mit nya mandi ba sungai, ngambika iya tuai bulu lalu pia mega ngambika anak mit ke baru ada nya sebulu enggau menua ke alai iya ada.

    “Reti bukai pengawa tu mega deka minta berekat Petara ngibun mandung sereta ngemataka pejalai pengidup anak mit ke udah dipandi berengkah ari diatu nyentuk jemah,” pia ku Tuai Rumah Chambers, 52 taun, nerang lebuhka dirandau pengarang berita.

    Ku iya, pengawa tu mega chara kitai di rumah panjai besampika anak mit ngembuan ulah ti likun, bidik, lansik, sereta nemu bebasaka orang tuai kelimpah landik enggau pintar ngidupka diri lalu dikereja ungkup anak mit lelaki enggau indu.

    Lebuh meri anak mit tu mandi, piring endang bisi di kena bepinta ngagai Petara ngambika anak mit nya tau teulihka berekat ari Petara ai, Petara ke endang udah nulung orang tuai kelia ti berumpang menua ke diuwan uchu ambu sampai ke sehari tu.

    “Pengawa kitai pagi tu dipungkal enggau pengawa miring dibai ke sungai, nyempulang anak mit dipandi kitai. Anak mit ti deka dipandi, dipangku indai iya, dibiau ngena manuk, mangku piring diri empu.

    “Piring tu dua iti aja, tiga sirap pinang siti-siti (Turun tiga ko kami ditu nyebut). Piring tu tadi, siti dibuai ke ai sebedau anak mit nya disungga ke ba ai, lalu siti di engkah ke ba tebing sungai.

    “Piring ke ba tebing nya dipanggai ba atas seregang tauka teresang. Ke ba ai nya ungkup petara ai, ke ba tebing nya ungkup petara aki ini kitai kelia enggau sida ari panggau libau.

    “Piring tu digenselan ngena manuk ke udah di bunuh lebuh nyunggaka anak mit ke mandi nya tadi.

    SAMPAL: Sida ke tuai nguluka bala bukai nyempulang penurun anak mit mandi ngagai sungai.
    Enti kelia, sida ke indu deka ngena kain kebat lalu ke lelaki ngena sirat, bebaju burung enggau lelanjang tauka ketapu silong ngiring penurun anak mit nurun mandi ke sungai, kelebih agi orang ti deka nyungaka anak mit mandi.

    Tang diatu, seruyut ubah dunya, pekayan ti dikena gawa ba adat tu nyau dipuntang, baka sida ke ngempu pengawa pagi tu, ku Tuai Rumah Chambers nambah.

    Pia mega ku iya, sebedau ngepunka adat tu, sekeda raban deka mai kereban asal kitai, betabuh mangkung tawak enggau nebah gendang dikena ngiring penurun anak mit nya ngagai pendai.

    “Lebuh ke nyunggaka anak mit nya mandi, manuk siku disayat ari ulu pemandi ngambika darah nya nelusur kili lalu nyadika genselan anak mit ke mandi nya tadi.

    “Pengawa tu dikereja muakka pagi, lalu berengkah ari rumah dikereja ngena cara ngelaluka Petara lalu disereta enggau gendang tauka tabuh tabuh,” ku iya nerang silik.

    Seregang tauka teresang mega bisi didiri ba pendai endur manggaika piring lalu leka sampi endang semampai nyampika pejalai pengidup anak mit nya meruan likun kelebih agi ba pengawa di sungai, ku iya nusi.

    “Kelia, piring deka diselap ngena daun maya dipanggai ba atas teresang, tang diatu diganti ngena mayuh macham utai bukai dikena nyelap piring, taja pia teresang meruan digaga ari buluh.

    “Tembu pengawa meri anak mit mandi nya tadi, sida serumah enggau bala ke bisi ngulu pengawa begelumu ba ruai orang ke bempu pengawa, dientudika pengawa indai enggau anak mit ti diberi mandi diasuh duduk ba bangku, enti kelia duduk atas tawak, di ruai lalu dibiau ngena manuk.

    “Kebuah ke miau ngena manuk awakka anak mit nya tadi dituchi ari semua utai ti tau ngachau pengerai sereta mansang besai enggau meruan.

    “Orang ti miau nya deka dipilih ari sida ti bidik lansik, tauka orang ti bisi ngembuan pelajar sekula ke tinggi. Kebuah pia laban ngambika berekat jari sida ke bidik lansik sereta sida ke bepelajar lalu anak mit ke dibiau nya tau neladan sida nya jemah ila.

    “Abis pengawa bebiau bala mayuh ke bisi datai lalu serumpu makai selamat di ruai lalu pemakai nya disediaka sida ti bempu pengawa,” ku iya nambah.

    Kenu ku iya, diatu adat baka nya nyau jarang dikereja kelebih agi apai indai ke bisi anak mit sekalika ketegal sida enggai kiruh, udah ngelengka pengarap lama lalu megai pengarap baru tauka enda nemu baka ni chara ngereja adat tu.

    “Kemaya hari, kitai meda tebal agi sida tu diau di mengeri, nitihka pengawa, nya kebuah adat ke bansa tu enda entu dikeibuh tauka enda dikemeran rebak baru ngujungka iya majak lenyau.

    “Kami di menua tu naka ulih ngiring sereta ngiri penemu pasal adat tu ngagai rebak baru ngambika iya mudah lenyau ngapa diseruyut jeman lalu meruan dikereja dataika jemah,” ku iya nyimpul penemu diri. #UtusanBorneo

    No comments

    Post Top Ad