ISM begulai enggau JPW udah mujur ngatur ‘Karnival Sukan Rakyat’ - Berita Iban Online

Header Ads

  • Baru Nyadi

    ISM begulai enggau JPW udah mujur ngatur ‘Karnival Sukan Rakyat’

    Datuk Seri Rohani Karim
    SRI AMAN: Opis Menteri Orang Indu, Ruang Bilik enggau Komuniti (KPWKM) nengah Atur Pemansang Malaysia Lumpar Kesebelas (RMK11) udah ngelangkar mayuh inisiatif nengah program ti disediaka nyadi pelasar dikena opis menteri nya sereta ejensi ari baruh opis nya betemu sereta ngaga kaul ti rat seraya madahka servis KPWKM enggau nyemetak agi dikena nyambut peminta raban ti dituju.

    Menteri KPWKM Datuk Seri Rohani Karim madah, pekara ti manah ba taun 2018 iya nya opis menteri nya deka meri kelala Program Touch Points entara nya nengah Karnival Lumba enggau Main Rayat.

    “Karnival ti nengah konsep lumba enggau main rayat sereta pengawa pemandang ari opis tauka ejensi iya nya pengawa tambah dikena ngemesaika servis, tanggungpengawa, tuju sereta inisiatif ke benung digaga raban KPWKM seraya ngerapitka kaul entara ejensi perintah enggau peranak di kandang menua nya,” ku iya.

    Rohani ke mega Kaban Parlimen (MP) Batang Lupar madah munyi nya lebuh ti bejaku bejadika Karnival Sukan Rayat ti bepalan di Dewan Suarah Sri Aman ditu, kilah ensana.

    Ku iya, idea ‘Karnival Sukan Rakyat’ nya kebendar datai ari iya empu.

    “Aku udah minta opis enggau ejensi ari baruh opis menteri aku ngambika nemu sekeda kandang menua enggau genturung pendiau ke engkeman dikena ngaga aktiviti bansa tu,” ku iya.

    Ku iya nambah, piak Institut Sosial Malaysia (ISM) enggau Opis Pemansang Orang Indu (JPW) udah mandangka sekeda main rayat ti endang engkeman baka Mai Buah Ping Pong Dalam Sudu, Boling Nyiur, Pekit Makai Pisang (entara ruang bilik), Pekit Nganyam Ketupat, Pekit tikau Selipar, Pekit Nyumpit, Pekit Main Selingkut, Pekit Bangku Berachun enggau mega Pekit Nyura kategori nembiak.

    “Pandak jaku, pekit ke digaga deka ngaul semua serak komuniti sekalika orang indu, lelaki, nembiak, tauka siti ruang bilik.

    “Aku mega ngarap tu nyadi palan dikena kitai mantaika baru lumba enggau main rayat ke udah tentu deka ngerapatka kaul sereta mega deka meri empas ti positif ngagai pengerai enggau pengeransing tubuh kitai,” ku iya.

    Ku iya nambah, ‘Karnival Sukan Rakyat’ ke diatur ISM enggau JPW nya mega mai reti ti sama iya nya deka ngerapitka kaul entara diri sebilik enggau komuniti nengah aktiviti lumba enggau main ti enda ngena gajet.

    “Aktiviti ti dipejalai sekali tu iya nya ukai semina ulih ninggalka kenang ti manah ngagai raban nembiak, baka kitai dulu kelia ti suah agi main mayuh macham main tradisionalo tang mega ulih meri awak kitai begulai enggau diri sebilik,” ku Rohani.

    Sama bisi ba pengerami nya Residen Sri Aman Indit Bangai, Pemesai Pelilih Sri Aman sereta Pemesai Kanan KPWKM ke bukai.

    Ba pengerami nya, Rohani mega udah nyuaka geran perintah ngagai 13 buah Gerempung Ukai Dikuasa Perintah (NGO), kelab, sereta Komiti Pemansang enggau Pengelikun Genturung Pendiau (JKKK) ti semua nya sepenyampau RM118,500. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads