JKKK patut ngenatai penanggul rayat ngagai perintah, ku Masir

Datuk Masir Kujat

SRI AMAN: Kaban Komiti Pemansang enggau Pengelikun Genturung Pendiau (JKKK) ditesau ngambika nyadi ejen pengubah enggau nerang penerang ngagai perintah bekaul enggau isu pengelantang pendiau tauka penanggul rayat ba sitak diri.

Sapit Menteri Dalam Menua Datuk Masir Kujat madah, kaban JKKK sempama  ‘jambatan’ ti besambung rayat enggau perintah.

“Genap JKKK patut besambungka rayat enggau perintah.

“Genap JKKK patut ngenataika penanggul rayat. Nyema JKKK enda meri kerjasama penuh ngagai perintah tentu tusah perintah deka meri projek pemansang ungkup sitak nya,” ku iya.

Iya ke mega Kaban Parlimen Sri Aman madah munyi nya rambau Pengerami Ketuai Begulai Enggau Rayat ba Rumah Pilit Embuyang, Kaong, Ulu Undop ditu kemari.

Masir madah penumbuh JKKK endang sebengkah jalai dikena ngajar komuniti gawa ngatika diri enggau chakah ba pengawa pemansang.

“Organisasyen JKKK bejalaika tanggungpengawa besai nyadi injin pengereja pengawa ke pemadu pemun.

“Nya alai, beguna amat ungkup genap  JKKK diberi latih sereta pengelandik dalam semua sukut penumbuh, atur pengawa, ngintu enggau ngaduka pemansang nuju JKKK ke bisi juluk, berdikari, produktif sereta seruan idup,” ku iya.

Berebak enggau nya, Masir nyuaka bantu RM20,000 dikena sida ngaga ruai rumah panjai, udah nya RM5,000 ngagai JKKK sereta RM3,000 ungkup Biro Indu ke tuju bejalaika aktiviti sepanjai taun sida. #UtusanBorneo