Header Ads

  • Berita Tebaru

    JPBN Sarawak diberi kelai lima bintang

    Datuk Seri Dr Shahidan Kassim
    SIBU: Taja napi pengurang mimit, pengatur tasah bah di nengeri Sarawak udah bejalaika pengawa enggau chukup manah, ku Menteri ba Opis Menteri Besai Datuk Seri Dr Shahidan Kassim.

    Iya tepantup ati enggau tikas pengatur nya lalu meri kelai lima bintang ngagai Komiti Pengtur Tasah Nengeri (JPBN) betuaiaka Sapit Kepala Menteri Datuk Amar Douglas Uggah Embas enggau komiti-komiti renggat bagi menua ke bekaul.

    “Taja bisi pengurang, semua sida ke tasah dijaga enggau manah. Aku meri lima bintang,” ku iya rambau aum pemberita ba Padang Bilun Sibu kemari.

    Shahidan datai ba Sibu lemai ensana begulai enggau Ketuai Direktor Ejensi Pengatur Tasah Menua (NADMA) Datuk Abd Rashid Harun betuju ngabas bah ke nyadi ba Selangau malam ensana.

    Ba penemuai nya iya madah palan pengenduh sementara ba SJKC Tong Ah enggau Opis Pelilih Selangau napi penanggul tejanggal bekal ai beresi ari Sibu.

    “Sehari tu bekal ai nya engka deka diadu tang aku udah madah ngagai opis pelilih ngambika sida meli ai ba dedini endur ke semak awak ulih diberi ngagai sida ti tasah bah lalu nya dibayar NADMA,” ku iya.

    Kenu ku Sahidan, sebagi ari 4,000 dinding fleksibel ke udah datai ba Kuching deka disadung lengkas ngagai Selangau kelimpah kipas dikena meri pengelantang ngagai sida ke tasah bah.

    Ungkup guna dudi hari, penyampau bot deka ditambah dikena mantu pengawa mindahka sida ti kena bah berindik ari semina bisi empat bot aja dikembuan Opis Penyaga Periman enggau ejensi bukai ke diguna Selangau jam kediatu. #Bernama

    No comments

    Post Top Ad