Header Ads

  • Berita Tebaru

    JPJ deka ngatur program SKSJ di Kota Samarahan kena 10 Februari

    Logo JPJ
    KUCHING: Opis Perengka Pengangkut Jalai (JPJ) deka ngatur Program 1 Komuniti 1 JPJ (SKSJ), ke nyadi sebengkah chara meri servis terus ngagai mensia mayuh di Parlimen Kota Samarahan, kelebih agi ti diau di menua pesisir ke deka ngulihka lisin deriba mutosikal (Kelas B2).

    Nitihka penerang ari JPJ, program nya diatur Kaban Parlimen Kota Samarahan Rubiah Wang lalu pinta penetap nyereta program nya, peranak Malaysia tauka peranak mendam beumur genap 21 taun; enda kala ngembuan sebarang kelas lisin deriba, nadai dalam rikod ba rintai chelum JPJ tauka Polis.

    Pom ulih diambi ba opis Palan Servis Rayat P197 Kota Samarahan, Opis Pelilih Asajaya, Opis Pem adah Pelilih Samarahan tauka betanya ngagai Komuniti 1Malaysia ke udah dichiri.

    Pengawa ngerejista deka diatur 10 Februari (Sabtu) ba Kompleks Sukan Asajaya.

    Dokumen ke patut dibai maya nya ila, salin kad pengelala, dua iti gambar (dibelakang nya burak) mesai saiz pasport; pom rejista ti udah disain ketuai bansa sereta mai yuran rejista RM200.

    Kelimpah ari nya, JPJ mega bisi nyendiaka rega bayar ke manah ngagai orang ke nyauka pinchin enggau ke udah pinchin gawa ba opis perintah di Kota Samarahan.

    “Enti kita siku ari orang kedeka pinchin (dalam timpuh 6 bulan sebedau pinchin tauka ke udah pinchin ari opis perintah, kita ulih nyereta Program 1 Komuniti 1 JPJ (SKSJ) Khas Kota Samarahan kena 10 Februari di Kompleks Sukan Asajaya, ngulihka lisin deriba mutosikal kelas B2 (baruh 250cc), taja pan kita bisi lisin deriba kelas ke bukai,” ku penerang ari JPJ.

    Dokumen ke patut dibai ungkup orang ke deka pinchin tauka ke udah pinchin gawa ba opis perintah iya nya dua iti gambar (dibelakang nya burak); salin kad pengelala; kad pinchin opis perintah tauka surat sah pengaji ngagai ke deka pinchin dalam timpuh 6 bulan.

    Nambahka nya patut peranak Malaysia, nadai timpang fizikal, bepengerai sereta nadai dalam rintai rintai chelum JPJ/Polis, lalu patut mai duit RM200. #UtusanBorneo

    No comments

    Post Top Ad