Header Ads

  • Berita Tebaru

    Kandang tasik Malaysia Timur diatu likun

    Komander Mahamad Nazir Darus
    Ketegal penyakah TLDM nyaga pengelikun begulai enggau raban tauka ejensi pengelikun ke bukai.

    KUCHING: Kandang tasik Malaysia Timur kelebih agi di Sabah diatu likun sereta nengeri nya likun dilawa mensia mayuh.

    Pegawai Memerintah Kapal Latihan Gagasan Samudera (KLGS), Tentera Laut Diraja Malaysia (TLDM), Komander Mahamad Nazir Darus madahka, nya berindik penyakah pengawa nyaga pengelikun TLDM begulai enggau raban tauka ejensi pengelikun ke bukai.

    “Ungkup kandang tasik di menua Sabah diatu, aku ngasaika ulih dijaga sereta likun endur mensia mayuh datai kin.

    “Nyaga pengelikun kandang tasik tu ukai semina TLDM ada, kami beserakup enggau soldadu sereta raban pengelikun ke bukai.

    “Ba kandang tasik Sabah enggau Sarawak endang seruran bisi kapal bejaga ba tasik,” ku iya.

    Nazir mansutka pekara nya lebuh dikerandau raban pengarang berita nyerumba Hari Nerima Penatai Mensia Mayuh KLGS ba Palan Penyangkai Kapal Pending ditu, kemari.

    Berebak enggau tu iya madahka sekalika pemayuh sereta penyukup raban TLDM di serata menua tu, iya madahka urung lebih 18,000 iku

    Taja pia iya madahka penanggul diatu ukai bekaul enggau pemayuh raban tang pengulih aset ke dikembuan TLDM dikena nyaga kandang tasik Malaysia Timur enggau Malaysia Barat.

    “Nama ke diguna kami iya nya pengulih kapal bejalaika operasyen. Kapal ke dikembuan kitai diatu udah tuai sereta ungkus ngemanahka kapal tu tinggi, nya alai kitai begunaka kapal baru.

    “Enggau juluk tauka visyen Panglima Soldadu Tasik ke baru diatu iya nya Program Transformasyen 15 ke 5, iya nya bisi 15 taun agi kitai deka bulih lima bansa kapal ke amat ulih nyaga pengelikun kandang tasik menua,” ku iya. #UtusanBorneo

    No comments

    Post Top Ad