Kena awak betuchuk vaksin nadai bebayar ngambika ulih nagang penyakit Rabies - Berita Iban Online

Header Ads

  • Baru Nyadi

    Kena awak betuchuk vaksin nadai bebayar ngambika ulih nagang penyakit Rabies

    Datuk Lee Kim Shin
    MIRI: Orang ti ngempu ukui ditu patut ngena awak ngulihka vaksin enggau nadai bebayar dikena nentuka kandang menua Utara Sarawak terus nadai Rabies.

    Menteri Muda Dagang Temuai, Seni enggau Main Asal, Datuk Lee Kim Shin madahka beberapa program vaksinasyen nadai bebayar dipejalai berenggat di Miri.

    “Miri agi nadai Rabies, taja pia kitai enda ulih ilap tang bejalaika pengawa nagang tumu meri vaksin nadai bebayar,” ku iya rambau Program Vaksinasi Rabies di Balai Suarah Miri, kemari.

    Pengempu ukui ku iya nyemetak madah patut sedarka Rabies tau ngasuh bebadi nyawa nyema mensia diketup ukui ti bisi sindrom Rabies.

    “Sida ti ngempu ukui patut bisi tanggungpengawa lalu enda nejuka ukui tupi sida lepas sereta ditutu ukui siga bukai,” ku iya nerang.

    Kaunsil Mengeri Miri (MBM) mega patut bekerejasama enggau Gerempung Ukai Dikuasa Perintah (NGO) nangkap ukui siga ti bekedayau di genturung pendiau enggau di kedai dagang.

    “Pekara pemadu beguna, pengempu ukui patut rejista ukui sida ngagai raban MBM sereta dituchuk enggau vaksin anti Rabies ninting taun,” ku iya.

    Kaban Kunsil Nengeri (ADUN) Senadin nya ngaku penatai ukui siga ketegal pengilap pengempu iya ti ilap sereta enda beratika pengerai jelu inang sida.

    Berebak enggau nya, Lee mega muji ‘Zero Strays’ ti bejalaika inisiatif nyekat indu ukui ari ke beranak dikena nagang pemayuh ukui siga.

    Gerempung nya ku iya bisi palan ngintu ukui siga ke alai tuju iya nagang, vaksinasyen kelimpah meransang mensia mayuh nginang ukui siga ti udah divaksin.

    “Pengawa nyekat indu ukui siga tu siti pengawa timpuh panjai laban nyema pemayuh ukui siga tu enda ditagang, iya tau ngemai igi penyakit Rabies datai ila,” ku iya.

    Sama bisi datai ADUN Piasau, Datuk Sebastian Ting, ADUN Pujut Ting Tiong Choo, Datuk Bandar Miri, Adam Yii, Residen Miri, Sherrina Husaini, Ketuai Bagi Pengerai Mensia Mayuh, Opis Menteri Kaunsil Kandang Menua enggau Pengawa Berumah Dr. Cheong Yaw Liang. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads