Kereban teknologi ngemudahka penerang dikenataika ngagai JPBN - Berita Iban Online

Header Ads

  • Baru Nyadi

    Kereban teknologi ngemudahka penerang dikenataika ngagai JPBN

    Datuk Amar Douglas Uggah Embas
    ASAJAYA: Komiti Mutarka Penusah Ngenyit Nengeri (JPBN) Sarawak nadai betapi enggau penanggul ari sukut ngenataika penerang enggau bantu ngagai orang ti tasah ampuh bah di nengeri tu.

    Sapit Kepala Menteri, Datuk Amar Douglas Uggah Embas madahka naka ke diatu, semua atur pengawa ngenataika penerang dipejalaika enggau lanchar.

    Lalu enggau pemisi kereban teknologi pemadu baru diatu ku iya, mega ngemudahka penerang dikenataika ngagai komiti JPBN.

    “Ngena teknologi pemadu baru diatu (media rama) kitai ulih ngeripot ngena chara terus baka di Selangau sehari tu.

    “Jalai alun entara Sibu enggau Bintulu putus, nyadi kitai meda pengawa (ngenataika penerang) nya amat ulih mantu sereta mudah,” ku iya.

    Uggah ti mega Chairman JPBN mansutka pekara nya lebuh dikerandau pengudah ngabas Palan Ngenduh Sementara di Kompleks Sukan Asajaya ditu, kemari.

    Sama bisi datai, Kaban Parlimen Kota Samarahan Rubiah Wang enggau Menteri Dagang temuai, Seni, Main Asal, Nembiak sereta Lumba enggau Main ti mega ADUN Asayaja, Datuk Abdul Karim Rahman Hamzah.

    Taja pia iya enda ngenggaika agi bisi sekeda endur di nengeri tu tusah dikangau laban ke nadai penyambung telekomunikasyen.

    “Nya alai kitai udah nempa kerejasama nengah Radio Amatur ngambika ngenataika penerang ngagai komiti JPBN Sarawak,” ku iya.

    Lebuh ke ngenang pasal nemuai seraya ngabas orang ti tasah ampuh bah, Uggah madahka Palan Ngenduh ba Kompleks Sukan Asajaya diatu bisi 275 iku orang ke ti mungkur78 ruang bilik ari enam buah genturung pendiau.

    Nitih ku iya, JPBN deka terus nyikap diri betapi enggau sebarang pekara ke ulih nyadi sepanjai minggu tu.

    Lalu Menteri ba Opis Menteri Besai, Datuk Seri Shahidan Kassim ku iya, udah ngaku sereta meri lima bintang ngagai JPBN ba pengawa meri bantu ke chukup ngagai orang ti betapi enggau penusah ampuh bah di Sarawak.

    Bepelasarka ripot penusah ngenyit Nengeri Sarawak ke dikeluarka JPBN Sarawak naka pukul 4 lemai kemari, bisi 20 palan ngenduh sementara agi dibuka ke mungkur 908 ruang bilik enggau 3,231 iku.

    Di Bagi Menua Samarahan bisi lapan palan ngenduh sementara ke agi dibuka ke endur 506 ruang bilik ngenduh ti mungkur 1,818 iku.

    Lalu palan pengenduh sementara ke pemadu mayuh endur orang ngenduh iya nya Palan Ngenduh Sementara SK Haji Bujang Rangawan Putin ti dibuka kenyau ari 4 Februari, ke bisi 174 ruang bilik ti mungkur 578 iku ari lima genturung pendiau.

    Di Bagi Menua Serian bisi semilan palan ngenduh sementara dibuka ke bisi 329 ruang bilik ti mungkur 1,171 iku orang ti  tasah ampuh bah, enggau palan ke pemadu mayuh iya nya Palan Ngenduh SK Tanah Putih ke bisi 77 ruang bilik ti mungkur 252 iku.

    Kelimpah ari nya di Bagi Menua Mukah naka pukul 4 lemai kemari bisi tiga palan ngenduh sementara dibuka ti bisi 73 ruang bilik ke mungkur 242 iku orang ti kena penusah ampuh bah. Pemadu mayuh ke kena ampuh bah dipindah ngagai Palan ngenduh Sementara SK Parish, Balingian ke bisi 30 ruang bilik ti mungkur 157 iku orang.

    Taja pia ,semua palan ngenduh sementara ke bisi dibuka di nengeri tu selamat sereta agi ulih dijaga.

    Palan pengenduh Dewan Masyarakat Segali ditutup pukul 1 lemai kemari (6 Februari).

    Kelimpah ari nya, bepelasarka penerang Opis Pelajar Nengeri Sarawak ti ngeripotka bisi 23 buah sekula ti ditutup lalu bisi 6 buah  sekula nyadi palan ngenduh sementara.

    Enam buah sekula ke nyadi palan ngenduh sementara nyengkaum SK Jh Bujang Rangawan, SK Mang, SK Haji Kelali Semera, SK Samarahan Estate, SK Parish, Balingian enggau SK Tanah Putih. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads