Ketuai komuniti meseti ngembuan mayuh penemu, ku Masir - Berita Iban Online

Header Ads

  • Baru Nyadi

    Ketuai komuniti meseti ngembuan mayuh penemu, ku Masir

    SETIPIKIT TUAI RUMAH: Masir (tiga kiba) nyuaka setipikit nyiri tuai rumah ngagai siku ari tuai rumah ti datai seraya dikemataka Mong (dua kiba) sereta bala ke bukai.
    Ngambika sida ulih besemekih dalam ngemansangka kandang endur ti dipegai sereta seruran nitihka pemansang dunya.

    SRI AMAN: Tetiap Tuai Rumah tauka tuai komuniti ba renggat keterubah patut ngembuan penemu ti besai dalam mayuh bidang ti ulih nyadika lalau sida ngatur genturung pendiau ke udah diungkupka ngagai sida.

    Tu berindik ari tiap tuai rumah tauka tuai komuniti ti ngembuan penemu dalam mayuh bidang ulih besemekih dikena ngangkat kualiti pengidup komuniti ti dipegai sida, pia ku Sapit menteri Dalam Menua II Datuk Masir Kujat.

    Ku iya madah, sida ti udah dipilih nyadi tuai rumah tauka tuai komuniti patut bejalaika tanggungpengawa enggau komited, lurus, sereta enda bechiping ngambika semua pekara pemansang ti dilangkar perintah ulih digaga enggau manah ungkup pemaik rayat.

    “Nyadi tuai rumah tauka tuai komuniti, kita patut begulai manah enggau pangan diri sereta rayat ari baruh pegai kita lalu bekunsika semua penanggul sereta ngiga jalai mutarka penanggul nya ngambika enda nekul pengelikun enggau pengelantang ti udah bisi.

    “Enggau jaku bukai sida patut nemu tetiap penanggul ti nyadi lalu enda sekekali ngelalaika penanggul nya ari rayat laban nyema penanggul nya enda diputar, tu deka meri empas negatif lalu deka mai penanggul ti besai agi nyadi ti ulih ngeruga sida empu sereta rayat,” ku iya nyemetak.

    Iya ke mega Kaban Parlimen (MP) Sri Aman madah munyi nya lebuh ti bejaku maya bejadika Pengerami Betemu enggau Sapit Menteri Dalam Menua II begulai enggau Ketuai Ejensi, Ketuai Komuniti sereta Gerempung Ukai Dikuasa Perintah (NGO) lalu pia mega pengawa Nyuaka Setipikit Nyiri Tuai Rumah sereta Tuai Kaum ti bepalan ba Dewan Datuk Mong Dagang, Sekula Primari (SK) Munggu Bringin ditu.

    Kelimpah ari nya ku iya, tetiap tuai rumah enggau tuai komuniti diperansang ngambi ngadaka kaul ti rat enggau mayuh ejensi perintah ngambika tetiap penanggul ti bisi ulih diputar. Pia mega, tuai rumah enggau tuai komuniti meseti landik ngena servis sereta bantu ke udah disediaka ejensi perintah lebuh ti mutarka penanggul ti ditapi.

    “Tuai rumah enggau tuai komuniti patut nejuka asai malu sida betemu ngagai ejensi perintah lalu anang sekekali nyimpan penanggul ke ditapi ngambika ejensi perintah ulih mantu sida mutarka penanggul nya.

    “Tetiap ejensi perintah ke ditumbuh iya nya nyadi ejensi ti dikena ngemuntangka pengawa rayat lalu beserimbai enggau nya, tuai rumah enggau tuai komuniti patut nemu sereta ngena servis enggau bantu ti disediaka enggau naka ulih,” ku iya.

    Sama bisi ba pengerami nya Kaban Kunsil Nengeri (ADUN) Bukit Begunan Datuk Mong Dagang, ketuai opis perintah sereta ke bukai.

    Ba pengerami nya, Masir mega udah nyuaka agih belanja sepenyampau RM10,000 ngagai Gerempung Apai Indai enggau Pengajar (PIBG) SK Munggu Bringin lalu sama mega bisi diberi iya nya bantu RM5,00 dikena ngatur aktiviti semanjai taun.

    Ba pekara ke bukai, Masir mega udah nyuaka setipikit nyiri tuai rumah sereta setipikit ungkup sida ti nyambung servis ngagai 117 iku tuai rumah di sitak DUN Bukit Begunan. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads