Header Ads

  • Berita Tebaru

    Kimpin Pengelikun Jalai Alun renggat Sibu beserimbai enggau TBC dipenyadi kemari

    Datuk Tiong Thai King
    SIBU: Kaban Kunsil Nengeri (ADUN) Dudong, Datuk Tiong Thai King udah bejadi Kimpin Pengelikun Jalai Alun beserimbai enggau Taun Baru China (TBC) renggat Sitak Sibu 2018 ditu, kemari.

    Kimpin tu diatur begulai Opis Pengelikun Jalai Alun (JKJR), Kaunsil Pengelikun Jalai Alun Sitak Sibu, Opis Residen Sibu, Opis Pelilih Sibu, polis trafik enggau Opis Perengka Pengangkut Jalai Alun (JPJ).

    Ba kimpin tu, Tiong bisi nyuaka penerang bekaul enggau pengelikun ba jalai alun ngagai mensia mayuh.

    Kelimpah ari nya, iya mega bisi meri helmet ngagai sida ti bekenaka mutosikal.

    Ba pekara bekaul, penyampau kes bebadi jalai alun di Sibu bisi nurun ba taun 2017 enti dibida enggau 2016.

    Nitihka ripot ari Indu Opis Polis Sibu, ba taun 2016, penyampau kes tu iya nya 2,339 lalu nurun ngagai 2,191 ba taun 2017.

    Bulan Januari taun tu diripotka bisi 176 iti kes.

    Ari 2,339 iti kes ba taun 2016, 44 iti kes nabanka nyawa lalu pia mega penyampau kes nabanka nyawa nya mengkang diripotka sebaka 44 iti ba taun 2017.

    Naka bulan Januari tu mega, lima iku iti kes nabanka nyawa diripotka nyadi.

    Kelimpah ari nya, 20,153 iti saman dipansutka ba taun 2016 lalu 21, 468 iti ba taun 2017 enggau 1,971 iti naka bulan Januari taun tu.

    Sama bela datai maya kimpin tu kemari iya nya Sapit Residen Sibu Wong Hee Sieng, Temenggong Stanley Geramong enggau Pemancha James Semilan. #UtusanBorneo

    No comments

    Post Top Ad