Header Ads

  • Berita Tebaru

    KKLW ngungkup RM1.102 bilion ke pemansang Sarawak

    BAUM: (kanan) Ismail Sabri enggau Uggah nyadi chairman begulai - Aum Komiti Tetinggi Bergulai enggau Perambu sereta Mantau Projek Opis Menteri Pemansang Menua Pesisir enggau Kandang Mengeri (KKLW)- Perintah Negeri Sarawak (JTB KKLW-Sarawak) Bilangan 1 Tahun 2018, kemari.
    KUCHING: Opis Menteri Pemansang Menua Pesisir enggau Kandang Mengeri (KKLW) ba bajet 2018 ngungkupka RM1.102 bilion tauka 28.48 peratus ari penyampau RM3.37 bilion bajet pemansang opis menteri nya ngagai Sarawak.

    Menteri nya, Datuk Sri Ismail Sabri Yaakob madahka penyampau belanja nya dikena bejalaika projek pemansang kelebih agi di menua pesisir di nengeri tu.

    Ba bajet 2018, opis menteri nerima ungkup belanja sepenyampau RM9.48 bilion, iya nya bisi nambah sepenyampau 6.66 peratus ari ungkup belanja taun 2017 RM8.89 bilion. Lalu ari penyampau nya, RM5.61 bilion (59 peratus) bajet ngaduka pengawa sereta RM3.87 bilion (41 peratus) bajet pemansang dikena ngemansangka 650 projek pemansang ti mungkur 178 projek baru enggau 472 projek sambung.

    “Ba Bajet 2018, opis menteri ngungkupka sepenyampau RM3.87 ngagai bajet pemansang. Lalu ari penyampau nya Sarawak diagihka sepenyampau RM1.102 billion, reti iya Sarawak bulih 28.48 peratus ari semua ungkup bajet pemansang.

    “Kami ulih mereti, Sarawak begunaka mayuh bajet dikena ngemansangka perengka guna mensia mayuh.

    “Enti kitai meda pengudah Datuk Seri Najib Tun Razak ngiring (nyadi Menteri Besai), kitai ulih meda bisi penambah ba penyampau bajet ke diagih ngagai Sarawak,” ku iya.

    Ismail mansutka pekara nya dalam aum pengarang berita pengudah Aum Komiti Tetinggi Bergulai enggau Perambu sereta Mantau Projek Opis Menteri Pemansang Menua Pesisir enggau Kandang Mengeri (KKLW) - Perintah Nengeri Sarawak (JTB KKLW-Sarawak) Bilangan 1 Tahun 2018, ke diatur ba sebuah hotel ditu, kemari.

    Bepelasarka agih tauka ungkup belanja nitihka projek taun 2018 Nengeri Sarawak, dalam Rolling Plan Ke-3 (RP3) Langgur Pemansang Malaysia Lumpar Ke-11 (RMKe-11), ungkup belanja nya dikemendarka sepenyampau RM400 juta dikena bejalaika projek Bekal Elektrik Menua Pesisir (BELB); RM138.04 juta (Bekal Ai Menua Pesisir); RM136.90 juta (Jalai Menua Pesisir); RM38 juta (Program Jalai Genturung Pendiau) enggau RM7 juta ungkup Program Ameniti Sosial.

    Opis menteri nya mega ba bajet 2018 bisi ngungkupka belanja ngagai ejensi di baruh Perintah Nengeri sarawak dikena bejalaika program baka Opis Betanam Betupi Sarawak diungkupka RM17.84 juta; Kaunsil Pemansang Tanah Sarawak (RM3 juta); Kaunsil Pemansang Bintulu (RM4 juta) enggau Kaunsil Pengintu enggau Ngempung Tanah Sarawak (SALCRA) sepenyampau RM18.6 juta.

    Berebak enggau tu Ismail madahka ba taun 2017 opis menteri udah melanja sepenyampau RM1.06 bilion dikena bejalaika projek di Sarawak.

    Bisi 81 projek udah dikemendarka ungkup Rolling Plan Ke-2 (RP2) Langgur Pemansang Malaysia Lumpar Ke-11 (RMK11) Taun 2017 di nengeri Sarawak.

    “Taun nyin kemari kitai bisi 81 projek lalu ari penyampau nya semilan projek udah tembu lalu 72 projek benung dipejalaika, semua projek nya (81 projek) begunaka ungkup belanja sepenyampau RM1.06 bilion.

    “Projek nya mungkur semua lebih agi tiga pekara ke besai iya nya bekal ai beresi menua pesisir, bekal elekterik menua pesisir, sereta jalai menua pesisir, tiga pekara besai tu pemadu dikemeratka. Tu projek ke bebesai.

    “Enti nyebut pasal jalai menua pesisir, reti iya jalai menua pesisir ti nyambungka entara genturung pendiau enggau genturung pendiau ke pasar sereta mega projek jalai genturung pendiau,” ku iya.

    Kelimpah ari nya lebuh ditanya bekaul enggau ‘missing link’, iya madahka diatu di nengeri tu nadai agi ‘missing link’.

    Pasal ‘missing link’ ari jalai Kapit ke Sibu iya madahka dipejalaika dalam dua pakej iya nya ti mungkur ari Temalat ke Ng Ngemah sepenyauh 9.6 kilometer enggau ari Ng Ngemah disambung 5.1 km ngagai jalai ke endang udah bisi.

    Ku iya, kunteriktor udah dipadu, reti iya nadai agi ‘missing link’, kitai mutarka pekara tu.

    Sama bisi dalam aum pengarang berita nya kemari, Sapit Kepala Menteri ti mega Menteri Betanam Betupi Moden, Tanah Adat enggau pemansang Mengeri Datuk Amar Douglas Uggah Embas, Sapit Menteri Pemansang Menua Pesisir enggau Kandang Mengeri Datuk Alexander Nanta Linggi, Menteri Utiliti Dato Sri Dr Stephen Rundi Utom enggau ke bukai. #UtusanBorneo

    No comments

    Post Top Ad